ગાંધીજીને બાબુ બોસનો પત્ર

બાપુ, આવો ડિફેક્ટિવ માલ વરસો વરસથી અમારા પાટનગરના રાજકીય ગોડાઉનમાં ઊધઈ ખાતો પડ્યો રહે છે. કરુણતા તો બાપુ, એ છે કે આવો ડિફેક્ટિવ માલ ક્રમશઃ વધતો જ જાય છે

- હર્ષદ પંડ્યા ‘શબ્દપ્રીત’

પૂજ્ય બાપુ,

નમસ્કાર,

આજે બીજી ઑક્ટોબર, તમારો બર્થ ડે. હેપી બર્થ ડે બાપુ! હું રાજકારણી નથી છતાં શુભેચ્છા પાઠવું છું કે ‘મેની મેની હેપી રિટન્સ ઑફ ધ ડે!’ સૌ પ્રથમ તો બાપુ, મારે તમારી કુશળતા પૂછવી જોઈએ, પણ તમારી કુશળતા પૂછવા જેટલો હું કુશળ નથી, એટલે કુશળતા નહીં પૂછવા બદલ ક્ષમા કરશો.

બાપુ, દર વર્ષે અમે ભારતવાસીઓ તમને વધુમાં વધુ બે વાર તો યાદ કરી જ લેતાં હોઈએ છીએ. એમાંય બીજી ઑક્ટોબર તો ખાસ! કારણ કે એ દિવસોમાં ખાદી ખરીદવામાં વળતર મળે છે! કેટલાક તો આ દિવસોમાં જ ‘ગાદી’ ખરીદવામાં (સામેના ધારાસભ્યને ખરીદવામાં) સ્પેશિયલ ડિસ્કાઉન્ટ પણ જાહેર કરતાં હોય છે. બાપુ, તમને તો ક્યાંથી ખબર હોય, પણ તમારા ગયા પછી અમારા રાજકારણીઓએ રાજકારણને ‘ખરીદ-વેચાણ સંઘ’માં પરિવર્તિત કરી નાખ્યું છે અને ઑક્ટોબર મહિનામાં (આમ તો દર વર્ષે સપ્ટેમ્બરથી જ શરૂ થઈ જાય તેવું) ‘જેન્યુઇન સેલ’ જોવા મળે છે. જેમાં કેટલાક ઇફેક્ટિવ ધારાસભ્યો અન્ય પાર્ટીના હાથે ખરીદાઈ જાય છે, પણ અમુક ‘ડિફેક્ટિવ’ ધારાસભ્યોનું વેચાણ તો પચાસ ટકા ડિસ્કાઉન્ટના ભાવે પણ નથી થઈ શકતું!

બાપુ, આવો ડિફેક્ટિવ માલ વરસો વરસથી અમારા પાટનગરના રાજકીય ગોડાઉનમાં ઊધઈ ખાતો પડ્યો રહે છે. કરુણતા તો બાપુ, એ છે કે આવો ડિફેક્ટિવ માલ ક્રમશઃ વધતો જ જાય છે. ઊધઈથી માલને અસર નથી થતી, પણ આવા માલને લીધે ઊધઈ સાફ થવા માંડી છે! તમે તો બાપુ પેલા રડ્યા ખડ્યા ‘સત્ય’ને શોધવામાં, સત્યને સમજવામાં પૂરી જિંદગી ખર્ચી નાખી, પણ અત્યારે તમારે એ લાડકવાયું સત્ય અમને ક્યાંય અનુભવવા તો શું, જોવા ય નથી મળતું! અમારા નેતાઓએ ‘સત્ય’ને શોધવામાં, સત્યને સમજવામાં આખી જિંદગી ખર્ચી નાખી, પણ અત્યારે તમારું એ લાડકવાયું સત્ય અમને ક્યાંય અનુભવવા તો શું, જોવાય નથી મળતું! અમારા નેતાઓએ સત્યને મોઢે લાચારીનો ડૂચો મારી દીધો છે. તમે તો તમારી આખી જિંદગીની લેબોરેટરીમાં ‘સત્યના પ્રયોગો’ જ કર્યા, પણ તમારા વારસદારો (કૌટુંબિક વારસદારો નહીં, રાજકીય અને ખાદી વારસદારો)એ તો એ જ ‘સત્ય’ને ‘અસત્ય'નો યુનિફોર્મ પહેરાવી દીધો છે.