મહાઠગ કિરણ પટેલ જલસાથી જેલ સુધી

અમદાવાદથી શ્રીનગર જવું હોય ત્યારે તે શ્રીનગરની ડેપ્યુટી કમિશનરની કચેરીને ફોન કરતો. પોતે વડાપ્રધાન કાર્યાલયના સ્ટાફમાં છે અને સત્તાવાર રીતે શ્રીનગરની મુલાકાતે આવી રહ્યો છે એવું જણાવતો. આ રીતે પીએમઓના નામે ફોન કરીને વીઆઈપી સિક્યૉરિટી આપવાની પણ સૂચના દેતો!

- ઇમરાન દલ

મહાઠગ, ચાલબાજ ચીટર તરીકે કુખ્યાત બનેલા કિરણ પટેલે પ્રધાનમંત્રીની ઑફિસના સ્ટાફના સ્ટ્રેટેજી અને કેમ્પેઇનિંગ વિભાગના એડિશનલ ડાયરેક્ટર તરીકેની ખોટી ઓળખ આપીને જે કારસ્તાનો આચર્યા એ પ્રકરણ છેલ્લા બે માસથી સમગ્ર દેશમાં ચર્ચામાં છે. તે કાશ્મીરમાં ઝેડપ્લસ સિક્યૉરિટી મેળવીને બુલેટપ્રૂફ વાહનો સાથે ફરતો. સૂકામેવા, કેસર અને સફરજનના વેપારીઓના વિકાસ માટે બોગસ પત્રો રજૂ કરી, એમની સાથે બેઠકો કરતો. ઉપરાંત તેણે લાલચોક, ભારત-પાક બોર્ડર ઉરી અને ગુલમર્ગ જેવા સંવેદનશીલ વિસ્તારોની પણ મુલાકાત લીધી હતી.

અમદાવાદથી શ્રીનગર જવું હોય ત્યારે તે શ્રીનગરની ડેપ્યુટી કમિશનરની કચેરીને ફોન કરતો. પોતે વડાપ્રધાન કાર્યાલયના સ્ટાફમાં છે અને સત્તાવાર રીતે શ્રીનગરની મુલાકાતે આવી રહ્યો છે એવું જણાવતો. આ રીતે પીએમઓના નામે ફોન કરીને વીઆઈપી સિક્યૉરિટી આપવાની પણ સૂચના દેતો! તે શ્રીનગર ઍરપોર્ટ પર ઊતરતો ત્યારે તેને પોલીસ ઍસકોર્ટ સાથેની કાર મળતી. પ્રોટોકોલ મુજબ લલિત ગ્રાન્ડ હોટલમાં તેના નામે રૂમ બુક કરાવવામાં આવતો. ચુસ્ત સુરક્ષા સાથે તે હોટલના રૂમે પહોંચતો. નવેમ્બરથી માર્ચ દરમિયાન તેણે આ પ્રકારે ચાર વખત કાશ્મીરમાં સરકારી ખર્ચે મોજ માણી.

૨૬મી ફેબ્રુઆરીએ તે શંકાના પરિઘમાં આવ્યો. બીજી માર્ચે ગુજરાત ભાજપના બે નેતાના પુત્રો તેની સાથે ગયા હતા. જોકે પોલીસ ફરિયાદમાં એમનો ઉલ્લેખ કરવામાં આવ્યો નહોતો. અલબત્ત, બંનેની પૂછપરછ કરવામાં આવી હતી. તપાસ દરમિયાન એવી પણ વિગતો સામે આવી કે કિરણ પટેલ ૨૦૧૪થી કાશ્મીરમાં અવરજવર કરતો હતો. તે કાશ્મીરમાં સ્થાનિક ભાજપ કાર્યાલય અને નેતાઓના સંપર્કમાં રહેતો. ત્યાં એમને તે સ્થાનિક તથા વિધાનસભાની ચૂંટણી માટે વડાપ્રધાન કાર્યાલયે મોકલ્યો હોવાનું કહેતો. પ્રકરણની ગંભીરતાને ધ્યાને લઈને એનઆઈએ (નેશનલ ઇન્વેસ્ટિગેશન એજન્સી) પણ સમગ્ર તપાસમાં જોડાઈ છે ત્યારે કિરણ પટેલના મામલે અત્યાર સુધીમાં શું શું થયું એ ઘટનાક્રમ પર એક નજર કરીએ.

શ્રીનગરમાં ધરપકડ