વિશેષ રીતે સક્ષમ બાળકો માટે કામ કરવાની ખેવના રાખે છે મોનાલિસા બાલ

મોનાલિસા બાલ વ્યવસાયે શિક્ષક છે. શિક્ષકોને ભાવિ પેઢીના નિર્માતા માનવામાં આવે છે. જો આપણી ભાવિ પેઢી સાક્ષર અને સક્ષમ હશે તો રાષ્ટ્ર પણ એટલું જ મજબૂત અને અગ્રેસર બનશે

- હેતલ ભટ્ટ

શિક્ષણ આપવું અને જ્ઞાન આપવું એક રીતે જોવા જઈએ તો એક સિક્કાની બે બાજુ જેવું છે. જ્ઞાન અર્જિત કરવાથી જીવન સરળ બને છે. શિક્ષણ અર્જિત કરવાથી પણ જીવન સરળ બને છે, પણ જે બાળકો શિક્ષણ અને જ્ઞાન અર્જિત કરવા સક્ષમ નથી અથવા જેમને માનસિક અને શારીરિક સ્તરે એ મેળવવામાં તકલીફ પડી રહી છે એવાં બાળકોનું શું. તો તેનો જવાબ છે મોનાલિસા જેવા શિક્ષકો. આપણે ત્યાં અંધજન મંડળ કે અપંગ માનવ સેવા મંડળ, મૂક-બધિર બાળકો માટે શાળાઓ એવી ઘણી સંસ્થાઓ છે, જે બાળકોને શિક્ષિત બનાવવા કે જ્ઞાન આપવાનું કામ કરી રહી છે, પણ એવા બહુ ઓછા લોકો છે જેઓ સ્વૈચ્છિક સ્તરે સામાજિક દાયિત્વ નિભાવવાના આશય સાથે માનસિક કે શારીરિક રીતે વિકલાંગ (દિવ્યાંગજન - સ્પેશિયલી એબલ્ડ) બાળકો માટે કામ કરવાની ખેવના રાખે છે. ભારતમાં ગુજરાત સહિત અનેક રાજ્યોમાં ચોક્કસથી કેટલાક એવા હીરો તો મળી જ આવશે જેઓ સ્પેશિયલી એબલ્ડ બાળકોની ચિંતા રાખીને તેમને સાક્ષર બનાવવાનું કામ કરી રહ્યા છે, જેથી તેઓ જીવનના વિવિધ તબક્કે મુશ્કેલીઓને પાર પાડવામાં સક્ષમ બને અથવા પોતાની ખામીને કારણે હતાશ કે નિરાશ ન થાય. સ્પેશિયલી એબલ્ડ બાળકો માટે કામ કરતા વ્યક્તિઓ પૈકીનું એક જાણીતું નામ છે – મોનાલિસા બાલ.

મોનાલિસા બાલ વ્યવસાયે શિક્ષક છે. શિક્ષકોને ભાવિ પેઢીના નિર્માતા માનવામાં આવે છે. જો આપણી ભાવિ પેઢી સાક્ષર અને સક્ષમ હશે તો રાષ્ટ્ર પણ એટલું જ મજબૂત અને અગ્રેસર બનશે. ટૂંકમાં, બાળકોના સર્વાંગી વિકાસ માટે જેટલી જવાબદારી પરિવારની હોય છે એટલું જ ઉત્તરદાયિત્વ શિક્ષકોનું પણ માનવામાં આવે છે અને આ જ સમજને પોતાની ફરજ અને જવાબદારી સમજીને મોનાલિસા બાલ વિદ્યાર્થીઓના ઘડતરનું કામ કરી રહ્યાં છે.