અમદાવાદની રંગભૂમિની ગઈકાલ, આજ અને આવતીકાલ..

નવી-નવી નાટ્ય સંસ્થાઓ, નવા કલાકારો પણ રંગભૂમિને '૮૦-૯૦ના દાયકામાં મળ્યા. અમદાવાદના ઘણા કલાકાર મુંબઈ પણ ગયા અને સફળ થયા. નવા કલાકારો અમદાવાદ આવ્યા

- જિતેન્દ્ર ઠક્કર

અભ્યાસમાં હું ૧૯૭૦માં આવ્યો.. અભ્યાસની સાથે, એક સપનું હતું કે નાટકોમાં કામ કરવું. લોકો દસ રૂપિયાની ટિકિટ લઈને મને જોવા આવે. એ વખતે દસ રૂપિયા વધારેમાં વધારે ટિકિટના દર હતા. ૧૯, ૭, ૫, ૩, અને ૨ રૂ. ટિકિટના દર હતા. કૉલેજમાં વાર્ષિક ઉત્સવનું મહત્ત્વ હતું. યૂથ ફેસ્ટિવલો થતા. આ કાર્યક્રમોમાંથી નવા કલાકારો મળતા. જે પછી પ્રચાર શૉ અને ચાલતી કલા સંસ્થાના ધંધાદારી નાટકોમાં કામ કરતા હતા.

૧૯૭૦ના દાયકામાં અમદાવાદ રંગભૂમિ માટે મુખ્ય મથક હતું. જવનિકા કલાકેન્દ્ર ભરતનાટ્યપીઠ (જશવંત ઠાકર), દર્શન થિયેટર (ચારુબહેન પટેલ), યંગ થિયેટર્સ (દિનેશ શુક્લ), રાજુ પટેલ અને અરુણભાઈ ઠાકોર સંચાલિત રંગમંડળ, અરવિંદ વૈદ્ય અને એ.એ. મન્સૂરી નાટ્યસંપદા અમદાવાદ, દિલીપ ગઢવીનું નટકલા, રાજેશ કુરેશીનું ગ્રૂપ વગેરે ધંધાદારી નાટ્ય સંસ્થાઓ કાર્યરત હતી. આ સિવાય અન્ય નાની-મોટી સંસ્થાઓ તથા રાજ્ય સરકારનાં પ્રચાર નાટકો કરતી નાટ્ય સંસ્થાઓ તથા નાટ્ય મંડળીઓ કામ કરતી હતી.. ડિસેમ્બરથી ફેબ્રુઆરી દરમિયાન દિનેશ હૉલમાં I.N.T. મુંબઈનો પડાવ રહેતો.. નાટ્ય રસિયાઓને આ નાટકોનું પ્રવીણ જોશીનું ખૂબ આકર્ષણ હતું. હું પણ આ નાટકો જોવા અચૂક જતો અને પ્રવીણ જોશી જેવા અદાકાર થવાનાં સપનાં જોતો. કૉલેજમાં મારા ટ્રસ્ટી પ્રફુલ્લરાય પંડ્યા મને કૉલેજનો પ્રવીણ જોશી જ કહેતા.