ગુજરાતી સિનેમા: ભાતીગળ ભૂતકાળ, રોમાંચક વર્તમાન, આશાસ્પદ ભવિષ્ય

હાલ, ગુજરાતી ફિલ્મ ઇન્ડસ્ટ્રી જે સમયમાંથી પસાર થઈ રહી છે તે એક નિર્ણાયક સમયગાળો એટલા માટે છે કેમ કે અત્યારે આપણે જે કામ કરીશું તેના આધારે ગુજરાતી સિનેમાનો ઇતિહાસ રચાશે દસ વર્ષ પહેલાં જ્યારે ગુજરાતી ફિલ્મ્સ બનતી હતી ત્યારે સૌથી મોટો પ્રશ્ન હતો કે શું ગુજરાતી દર્શક ગુજરાતી ફિલ્મ જોવા માટે થિયેટરમાં આવશે? હવે એ મુશ્કેલી મહદઅંશે ઘટી ચૂકી છે

- અભિષેક જૈન

ગુજરાતી ફિલ્મ ઇન્ડસ્ટ્રી, જેને સમાચાર પત્રો અને ઍન્ટર્ટેઇનમૅન્ટ મૅગેઝિન્સ ‘ઢોલીવૂડ’ પણ કહે છે. આ ઇન્ડસ્ટ્રી છેલ્લાં વર્ષોમાં ઘણા બધા ચઢાવ-ઉતારમાંથી પસાર થઈ છે. ગુજરાતી ઇન્ડસ્ટ્રી ભારતની બીજી બધી ભાષાઓના પ્રાદેશિક સિનેમા જેટલું પ્રબળ હજુ સુધી નથી બની શકી. આ હકીકતની પાછળ ખૂબ બધાં કારણો છે, પરંતુ આપણે જોવા જઈએ તો દરેક સમયગાળામાં અમુક ફિલ્મ મૅકર્સ એવા હતા જ જેઓ પોતાની ગુજરાતી ભાષા માટેના પ્રેમને લઈને સારી ફિલ્મો બનાવતા રહ્યા અને રિમાર્કેબલ કામ કરતા રહ્યા અને આજે તેમના થકી જ હું અને મારી જનરેશનના બધા જ ફિલ્મમૅકર્સ બહોળા પ્રમાણમાં કામ કરી શકીએ છીએ. ગુજરાતી ફિલ્મ ઇન્ડસ્ટ્રીએ આજ સુધીમાં ઘણી બધી તડકી છાંયડી જોઈ છે તેનું મને એક મહત્ત્વનું કારણ હંમેશાંથી લાગતું આવ્યું છે કે દરેક પ્રજાને પોતાની ભાષા માટે ગર્વ હોય છે. આપણી ભાષા, કલા અને સંસ્કૃતિ માટે આપણે એટલા ગર્વીલા નથી રહ્યા જેટલું આપણે હોવું જોઈએ.

પણ મારા મતે હાલનો સમય ગુજરાતી સિનેમા માટેનો સુવર્ણકાળ છે. પહેલાં થિયેટરમાં ફિલ્મ જોવા જતાં સરેરાશ ગુજરાતીના લિસ્ટમાં ક્યાંય ગુજરાતી ફિલ્મનું નામ જ નહોતું. એ પછી છેલ્લાં અમુક વર્ષોમાં ગુજરાતી ફિલ્મ ગુજરાતી દર્શક માટે સેકન્ડ ઑપ્શન બની અને હવેનો સમય એવો છે કે લોકો હોંશે હોંશે ગુજરાતી ફિલ્મ જોવા જવા લાગ્યા છે. હાલના સમયમાં બનતી ગુજરાતી ફિલ્મોમાં ઘણા ફેરફારો આવી રહ્યા છે. નવી પેઢીના ફિલ્મ મૅકર્સ તેમની પોતાની રીતે નવી વાર્તાઓ કહેવાનો પ્રયાસ કરી રહ્યા છે અને તેમને નવી પ્રોડક્શન ટૅનિક્સનો પણ એટલો જ ફાયદો મળી રહ્યો છે. જ્યારે ટૅક્નોલૉજીમાં આટલા ફેરફારો આવી રહ્યા છે અને વાર્તાઓની દૃષ્ટિએ પણ આજના સમયમાં અનેક શક્યતાઓ સમાયેલી છે, ત્યારે આ બદલાવનો ભાગ બનવું એ મારા માટે લહાવો છે.