ચહેરાની સ્કિન માટે મદદરૂપ સ્કિન ટૂલ્સ

ત્વચાના પ્રકારને ઓળખીને તેને અનુરૂપ સ્કિન કેર પ્રોડક્ટની પસંદગી કરવી જરૂરી છે. બીજી મહત્ત્વની વાત એ છે કે જે રીતે સ્કિન કેર પ્રોડક્ટને રૂટિનમાં સામેલ કરતાં હાઈએ છીએ એ જ રીતે સ્કિન કેર ટૂલ્સનું પણ એક ટાઇમટેબલ બનાવવું અને તે અનુસરવું અગત્યનું છે.

- હેતલ ભટ્ટ

ત્વચાની જાળવણી માટે આપણે વિવિધ સ્કિન કેર પ્રોડક્ટ અને નુસખા અનુસરતા હોઈએ છીએ. જોકે ક્યારેક ઉંમરના કારણે તો ક્યારેક હોર્મોનલ ચેન્જના કારણે ત્વચાને લગતી સમસ્યાઓ ઊભી થતી હોય છે. આવા સમયે સ્કિન કેર પ્રોડક્ટની સાથે કેટલાક સ્કિન કેર ટૂલ્સની મદદ લેવાથી ત્વચાને જીવંત રાખવામાં અને સ્વસ્થ બનાવી રાખવામાં ઘણી મદદ મળતી હોય છે. આજે એવા જ કેટલાંક ટૂલ્સ વિશે વાત કરવાના છીએ. મહત્ત્વની વાત એ છે કે આ ટૂલ્સનો ઉપયોગ ૩૦ વર્ષથી ઉપરની કોઈ પણ વ્યક્તિ કરી શકે છે. ઘણીવાર ત્વચાને લગતી સમસ્યાઓ ઊભી થાય ત્યારે જ તેના તરફ ધ્યાન આપતા હોઈએ છીએ, જ્યારે સમસ્યાઓની સામે રક્ષણ મેળવવા માટે સમસ્યા ઊભી થાય તે પહેલાં કેટલીક દરકાર લેવાય તો ઘણી બધી સમસ્યાઓ ઊગતી જ ડામી શકાય છે. અમુકવાર વ્યક્તિની ત્વચા પર ઉંમરના પ્રમાણમાં વહેલી કરચલીઓ જોવા મળતી હોય છે. આવા સમયે યોગ્ય કાળજી લેવામાં આવે તો રક્તસંચાર સુચારુ રીતે ચાલતું રહે છે અને તેને લગતી સમસ્યા પણ મહદ્અંશે નિવારવામાં મદદ મળતી હોય છે.