નિષ્કલંક મહાદેવ મંદિરે ભાદરવી અમાસનો લોકમેળો

શ્રીકૃષ્ણની સલાહ મુજબ કાળા રંગની ગાય અને ધજા લઈને નિષ્કલંક થવા નીકળેલા પાંચેય પાંડવો હજારો કિલોમીટર ચાલ્યા, પરંતુ એવું કોઈ સ્થળ-થાનક ન મળ્યું જ્યાં કાળા રંગની ધજા અને ગાય સફેદ થઈ જાય

- રક્ષા ભટ્ટ

ગુજરાત રાજ્યનો સૌરાષ્ટ્ર પ્રદેશ ભારતના પશ્ચિમ ભાગે સ્થિત દ્વીપકલ્પ છે, જેની ઉત્તરે કચ્છનો અખાત, પૂર્વમાં ખંભાતનો અખાત અને આ ઉત્તર-પૂર્વની મધ્યે અનેક ગામોની ધારોધાર ઘૂઘવે છે, હિન્દ મહાસાગરનો ભાગ ગણાતો અરબી સમુદ્ર.

સંત અને શૂરાઓની ભૂમિ ગણાતું આ સૌરાષ્ટ્ર સોરઠ તરીકે પણ ઓળખાય છે. દુહા, છંદ, લોકગીતો, લોકનૃત્યો, ભવાઈ, ડાક-ડમરું, ડાયરાઓ અને સંતવાણીના કાર્યક્રમોથી સતત ધબકતી રહેતી સોરઠની આ ભૂમિ પર આ બધા કાર્યક્રમો તો વર્ષ પર્યન્ત ફુલ ઓન ચાલુ જ હોય છે, પરંતુ એટલી જ હોંશથી અહીં લોકમેળાઓ પણ ઊજવાય છે. પૂરા ઉત્સાહથી ઊજવાતા આ લોકમેળાઓમાં જેમ જૂનાગઢમાં ભવનાથનો મેળો અને સુરેન્દ્રનગરમાં તરણેતરનો મેળો ભરાય છે તેમ ભાવનગરમાં ભાદરવી અમાસનો મેળો નિષ્કલંક મહાદેવ મંદિરે ભરાય છે.

ભાવનગર જિલ્લાના કોળિયાક ગામ ખાતે આવેલું નિષ્કલંક મહાદેવ મંદિર કોળિયાકમાં ઘૂઘવતા અરબી સમુદ્રની અંદર એકાદ કિલોમીટર ચાલીએ પછી આવતું શિવ મંદિર છે, જે પાંડવોએ સ્થાપેલું મંદિર મનાય છે.