કચ્છ હવાઈ માર્ગે વિદેશો સાથે જોડાવા માંગે છે

જેટલા કચ્છીઓ કચ્છમાં રહે છે, અંદાજે તેટલા કચ્છીઓ કચ્છ બહાર વસે છે. કચ્છના લોકો પેઢીઓથી કચ્છ બહાર રહેતા હોવા છતાં વતન સાથેનો સંબંધ જીવંત છે. તેઓ વારે-તહેવારે, લગ્ન પ્રસંગે વતન આવતાં હોય છે, પરંતુ તેમને વતન આવવામાં ભારે મુશ્કેલીનો સામનો કરવો પડે છે. કચ્છમાં ઇન્ટરનેશનલ ઍરપોર્ટ નથી, તેથી એન.આર.આઈ. કચ્છીઓને મુંબઈ, અમદાવાદ કે દિલ્હી થઈને આવવું પડે છે. ભૂકંપ પછી અહીં ખૂબ ઔધોગિક વિકાસ થયો છે. દેશ-વિદેશના લોકો ઉદ્યોગો માટે કચ્છમાં આવ-જા કરે છે. બાગાયતી ખેતી પણ વિકસી છે. કચ્છમાં પાકતાં ફળોની વિદેશમાં ખૂબ માંગ રહે છે. જો આંતરરાષ્ટ્રીય ઍરપોર્ટ મળે તો બાગાયતી પાકોની નિકાસમાં વિક્રમી વધારો થઈ શકે.

- સુચિતા બોઘાણી કનર

કચ્છને દેશનાં વિવિધ શહેરો સાથે જોડતી ફ્લાઇટ ઓછી છે. મુંબઈ, અમદાવાદ, દિલ્હીને બાદ કરતાં બીજા કોઈ પણ શહેરો માટે કચ્છથી ડાયરેક્ટ ફ્લાઇટ નથી. જે ફ્લાઇટ છે તેનું ભાડું પણ ખૂબ વધુ હોવાના કારણે સામાન્ય લોકોને કટોકટીના સમયે બીજા શહેરોમાં જવાનું ખૂબ મોંઘું પડે છે.

કચ્છીઓ વિશ્વ આખામાં ફેલાયેલા છે. પેઢીઓથી કચ્છ બહાર વસવા છતાં તેમનો પોતાના વતન સાથેનો સંપર્ક જીવંત છે. કચ્છીઓ દર વર્ષે એકથી વધુ વખત વતન આવે છે અને જાણે કાયમ કચ્છમાં જ રહેતાં હોય તેવી રીતે થોડો સમય રહે છે. વિદેશમાં વસતા કચ્છીઓને આવાગમન માટે ભારે મુશ્કેલી વેઠવી પડે છે. તેનું કારણ છે, કચ્છમાં એક પણ આંતરરાષ્ટ્રીય ઍરપોર્ટ નથી. કચ્છથી વિદેશમાં જવું કે આવવું હોય તો વાયા અમદાવાદ કે મુંબઈ કે દિલ્હી જવું પડે છે. તેમ જ ભુજથી અમદાવાદ, દિલ્હી કે મુંબઈની પૂરતા પ્રમાણમાં ફ્લાઇટ નથી. આથી એન.આર.આઈ. કચ્છીઓનો સમય અને નાણાંનો ભારે વ્યય થાય છે. આ ઉપરાંત છેલ્લા બે દાયકામાં કચ્છનો વિકાસ અકલ્પનીય ઝડપે થયો છે. અહીં દેશ-વિદેશના ઉદ્યોગો આવ્યા છે. તેના પગલે દેશભરનાં રાજ્યોમાંથી કે વિવિધ દેશોમાંથી કચ્છ આવનારા લોકોની સંખ્યામાં ઘણો વધારો થયો છે. તેમ જ આ સમયગાળામાં બાગાયતી ખેતી પણ ખૂબ વિકસી છે. કચ્છની કેસર કેરી, ખારેક, દાડમ તો દેશ-વિદેશ જાય જ છે હવે તો કમલમ્ તરીકે ઓળખાતા ડ્રેગન ફ્રૂટ પણ દેશ-વિદેશની માર્કેટ સર કરી રહ્યા છે. જો આંતરરાષ્ટ્રીય વિમાનમથક ભુજને મળે તો નિકાસમાં અનેકગણો વધારો થઈ શકે તેમ છે.

કચ્છમાં પ્રવાસન પણ એક ઉદ્યોગની જેમ વિકસ્યું છે. તેથી અહીં આવનારા પ્રવાસીઓ પણ ખૂબ વધુ છે, પરંતુ અનેક વિદેશીઓ કચ્છ સુધી ડાયરેક્ટ ફ્લાઇટ ન હોવાના કારણે કચ્છ આવવાનું ટાળે છે. જો અહીં વિદેશથી આવનારા પ્લેન ઊતરી શકે તો પ્રવાસનને પણ વધુ વેગ મળી શકે તેમ છે.

આંતરરાષ્ટ્રીય વિમાન મથક અને કાર્ગો ઍરપોર્ટ માટે કચ્છના લોકોની લાંબા સમયની માંગ છે, પરંતુ તેના પ્રત્યે ધ્યાન અપાતું નથી. ભુજનું હાલમાં સુરક્ષાદળો હસ્તક રહેલું ડોમેસ્ટિક ઍરપોર્ટ બહુ સહેલાઈથી ઇન્ટરનેશનલ ઍરપોર્ટ બની શકે તેમ છે. દેશનાં મોટાં-મોટાં બીજા ઇન્ટરનેશનલ ઍરપોર્ટની તુલનામાં ભુજના ડોમેસ્ટિક ઍરપોર્ટ પાસે વધુ માળખાકીય સુવિધા છે. જેના કારણે ખૂબ જ ઓછા ખર્ચમાં વધારાની સગવડ કચ્છવાસીઓને મળી શકે તેમ છે.

અનિલ ગોર