લાફ્ટર વાઇરસ

‘શબ્દપ્રીત’ આળસ ના ટકે આળસ વિના!

- હર્ષદ પંડ્યા

આળસ કરવામાં સહેજ પણ આળસ નહીં કરનારા લોકો જ આળસની ટીકા કરતાં હોય છે. જેમના પર આળસદેવીની કૃપા ઊતરી નથી, એવા લોકો આળસની ટીકા કરવામાં સહેજ પણ આળસ રાખ્યા વિના ધોધમાર ‘આળસ ટીકા’ કરતાં હોય છે. આળસ કરવામાં આળસને ઓળખવામાં અને સમજવામાં પણ આવા લોકો આળસ રાખે છે.

કોઈ ‘આળસ વિભૂષિત' મહાનુભાવે સહેજ પણ આળસ રાખ્યા વિના આળસના ગુણો દર્શાવી આળસનું મહત્ત્વ સમજાવ્યું છે. તુલસીદાસની ક્ષમાયાચના કરતાં એ મહાનુભાવે કહ્યું છેઃ ‘આલસ અનંત, આલસકથા અનંતા.’

મિત્રો, ચાલો આપણે પણ સહેજેય આળસ રાખ્યા વિના એ ‘આળસ-ગુણદર્શન’નો લાભ લઈએઃ

• ગૃહયુદ્ધ હોય, (પૂર્વ) ગ્રહ કે (આ) ગ્રહયુદ્ધ હોય કે પછી વિશ્વયુદ્ધ હોય, કોઈ પણ યુદ્ધને અટકાવવા માટેનો શ્રેષ્ઠ ઉપાય છે આળસ. બોલવામાં આળસ, હાથ ઉગામવામાં આળસ. શસ્ત્રો કે હથિયાર પકડવામાં આળસ. આવી વિશિષ્ટ આળસ કરવામાં જે સહેજેય આળસ કરતો નથી એને વિશ્વશાંતિ નો ઍવૉર્ડ મળવો જોઈએ.

• નાની-મોટી ચોરી અટકાવવાનું કામ એકમાત્ર આળસ કરે છે. આળસ અને કામચોરી – આ બંને ગુણોમાં ફરક છે. આ ફરકનું શ્રેષ્ઠ ઉદાહરણ છેઃ ચોર. નાની-મોટી કોઈ પણ પ્રકારની ચૌર્યકલાનો નિષ્ણાત ચોર ક્યારેક આળસ કરી શકે, પણ એ કામચોરી તો ન જ કરે. ચોર ક્યારેય કામચોર ન હોય. કામચોરી કરવા જાય તો એ જ કામચોરી એને ભારે પડે! આળસ એને ચોરી ન કરતાં અટકાવે, પણ કામચોરી એને ક્યારેક જેલભેગો પણ કરી શકે. આ સંદર્ભે તંત્ર આળસ કરે તો ચોર આબાદપણે બચી જાય.  આમ, કોઈકની આળસ કોઈને સજામાંથી આ રીતે બચાવી પણ શકે છે.

• કોઈ પણ જાતની હત્યા કે ખૂનખરાબાનું પ્રમાણ આજે આપણને ભલે વધી ગયું હોય એમ લાગે, પણ આળસીય વિશ્લેષકોનું એવું તારણ છે કે આપણો સમાજ આ બાબતે અમેરિકા જેવા ઓવર ડેવલપ્ડ નેશનમાં બનતા આ પ્રકારના બનાવોની તુલનામાં ઘણો સારો કહેવાય. અમેરિકા માં બનતા આવા ગુનાઓનો ઇન્ડેક્સ ઑલ ટાઇમ હાઈ રહે છે, એનું એક અને એકમાત્ર કારણ છે – આળસ નહીં હોવી તે! જી હા, ત્યાંના લોકો આ બાબતે ખૂબ જ ઉદ્યમપ્રિય છે. આનો અર્થ અમારો બાબુ બૉસ એવો કરે છે કે આપણે ભલે આળસ કરવામાં સહેજ પણ આળસ રાખતા ન હોઈએ, પણ અમેરિકન લોકો ગમે તેટલા કામઢા કે વર્કોહોલિક હોય, પણ આળસ કરવાની બાબતે તો એમના જેવા કોઈ આળસુ નથી.