લાફ્ટર વાઇરસ

સત્યની ગતિ બળદગાડા જેવી - જૂઠની ગતિ બુલેટ ટ્રેન જેવી!

- હર્ષદ પંડ્યા ‘શબ્દપ્રીત’

ચૂંટણીના સમયમાં પૂરો દેશ અવનવાં જૂઠનો સાચો આનંદ લેતો થઈ જાય છે. જૂઠનો પણ એક વિશેષ પ્રકારનો આનંદ હોય છે. જૂઠ બોલનારને જૂઠનો આનંદ મળતો હોય છે, એના કરતાં જૂઠ સાંભળનારને વધારે આનંદ મળતો હોય છે, કેમ કે બોલનારને એવો વહેમ હોય છે કે એ જે જૂઠ બોલે છે એની ખબર એના સિવાય બીજા કોઈનેય નથી હોતી અને હોય છે તો એની સમજ એને નથી પડતી, પણ સાંભળનારને તો પૂરી ખબર છે કે બોલનાર જેને સત્યના વાઘા પહેરાવી અમારી સામે રજૂ કરે છે એ પૂરા સો ટચનું અને ચોવીસ કૅરેટનું જૂઠ જ છે! અભિનેતા જેને ‘વાસ્તવિકતા’નો ઓપ આપીને રજૂ કરે છે, ઑડિયન્સ એને આબાદ ‘અભિનય’ માની એનો આનંદ મેળવે છે. કેટલાક રાજનેતા તો સાહેબ ઑડિયન્સને આકર્ષવામાં ડાયલોગ ડિલિવરી અને અભિનયની બાબતમાં અસલી અભિનેતાને પણ હજારો કિલોમીટર પાછા પાડી દે છે. અભિનયની બાબતમાં નેતા ઇઝ મૉર ઍક્ટિવ, મૉર ઍટ્રેક્ટિવ ઍન્ડ મૉર ઇફેક્ટિવ ધેન અભિનેતા!

ચૂંટણીની હવા જેમ-જેમ રિઝલ્ટ તરફ જવા લાગે છે તેમ-તેમ ધીરે-ધીરે ઓસરવા માંડે છે અને એ પછી રાજકારણના આકાશમાં વિવિધ રાજકીય પક્ષો પોતપોતાનાં જૂઠના પતંગો ચગાવવામાં મશગૂલ થઈ જતાં હોય છે. જે મજા પતંગ ચગાવવામાં છે એ મજા પતંગ ઉડાવવામાં નથી, કેમ કે ‘ઉડાવવું’ અને ‘ચગાવવું’ એમાં બહુ મોટો ફરક છે. ચૂંટણી પહેલાં પતંગ ચગતો હોય, રિઝલ્ટ પછી ‘ઊડતો’ હોય!