એનાલિસિસ.

અમેરિકાના નવા પ્રમુખ માટેની ચૂંટણી પર વિશ્વની નજર

- સુધીર એસ. રાવલ

આગામી ૫ નવેમ્બરના રોજ અમેરિકામાં યોજાનારી પ્રમુખની ચૂંટણીની વિશ્વભરમાં ચર્ચા ચાલી રહી છે. આ લેખ છપાશે ત્યાં સુધીમાં અમેરિકાના પ્રમુખપદ માટેની આગામી ચૂંટણીના બંને ઉમેદવારો વચ્ચે એક સીધી ડિબેટ થઈ ગઈ હશે. સૌ જાણે છે કે અગાઉ પ્રમુખ રહી ચૂકેલા રિપબ્લિકન પાર્ટીના ઉમેદવાર ડોનાલ્ડ ટ્રમ્પ અત્યંત આક્રમક છે અને તેમની સામે વર્તમાન પ્રમુખ અને ડેમોક્રેટિક પાર્ટીના ઉમેદવાર જો બાઇડેન સ્પર્ધામાંથી ખસી ગયા પછી તેમના સ્થાને આવેલાં અમેરિકાનાં વાઇસ પ્રેસિડન્ટ અને ભારતીય મૂળનાં કમલા હેરિસ પ્રમાણમાં વધુ સક્ષમ ઉમેદવાર હોવાથી મુકાબલો વધુ રોચક બની ગયો છે. રસપ્રદ બાબત એ છે કે અમેરિકામાં પ્રમુખની ચૂંટણીમાં બંને ઉમેદવારો સામસામે ડિબેટ કરે છે. આ ડિબેટને ત્યાં ટીવી ૫૨ લોકો ખૂબ રસભેર નિહાળે છે અને મતદાન પર આની ભારે અસર થતી હોવાથી આવી ડિબેટનું મહત્ત્વ પણ અનેરું છે. આ ડિબેટ માટે બંને પક્ષના ઉમેદવારોએ પોતાની નીતિઓ, મુદ્દાઓ, પ્રશ્નો, ટૂંકરેકોર્ડ તથા અમેરિકાના ભવિષ્ય માટે પ્રેસિડન્ટ તરીકેના પોતાના આગવા વિઝન જેવી બાબતો પર અસરકારક રજૂઆત કરવા માટે તૈયાર રહેવું પડે છે. ડિબેટમાં પ્રશ્નો પણ ધારદાર, અર્થસભર અને અઘરા હોય અને પ્રશ્નો પૂછનારા પણ નિષ્પક્ષ અને અભ્યાસુ હોય. લોકશાહી દેશ ભારતમાં આવું જોવા મળતું નથી તે કમનસીબ હકીકત છે. આપણે ત્યાં સીધા પ્રશ્નો પૂછી શકવાની મોટા ભાગના પત્રકારોની હિંમત થતી નથી અને સીધા પૂછાતા પ્રશ્નોનો સામનો કરવાની મોટા ભાગના નેતાઓની હિંમત હોતી નથી! ટીવી ઇન્ટરવ્યૂમાં પ્રશ્નોત્તરી મોટા ભાગે ગોઠવાયેલી જ જોવા મળે છે! નેતાઓની વાત કરીએ તો સામસામે ચર્ચાની તો વાત જ કયાં, પ્રતિસ્પર્ધી નેતાઓ સામસામે નજર મિલાવીને વાત પણ ન કરી શકે, તેવી સ્થિતિ હોય છે. ખેર, અમેરિકાની ચૂંટણીમાં આપણા કરતાં અલગ હોય તેવા ઘણા રસપ્રદ પાસાઓ જોવા મળે છે.

ચૂંટણી માટે રસાકસીભર્યો વ્યાયામ :