કેસરિયા તેરા ઈશ્ક...

રાજકોટમાં એક યુવકે કેસરનો પાક લેવામાં સફળતા મેળવી તો વડોદરાનાં એક દંપતીએ પણ ઘરઆંગણે કેસરની સોડમ ફેલાવી છે.

- નિતુલ ગજ્જર (વડોદરા)

દુનિયામાં સૌથી ઉમદા ગુણવત્તાવાળું કેસર ભારતમાં ઊગે છે અને એમાં પણ કશ્મીરમાં પેદા થતા કેસરનો તો દુનિયાભરમાં ક્યાંય જોટો જડે એમ નથી. જો કે હવે કશ્મીરમાં એ જ પ્રીમિયમ ગુણવત્તાવાળું કેસર આપણા ઘરઆંગણે એટલે કે ગુજરાતમાં ઉગાડવું શક્ય બન્યું છે. અગાઉ ચિત્રલેખા (૧૧ ડિસેમ્બર, ૨૦૨૩ના અંક)માં તમે વાંચ્યું હશે કે રાજકોટના ઔદ્યોગિક વિસ્તારમાં એક યુવાને કેસર ઉગાડવામાં પ્રારંભિક સફળતા મેળવી છે, તો હવે સંસ્કારી નગરી વડોદરાનાં એક યુગલને પણ શહેરી વિસ્તારમાં કેસર ઉગાડવામાં સફળતા મળી છે.

વૈભવ પટેલ: જાંબલી રંગનાં ફૂલની વચ્ચે લાલ રંગના તાંતણા હોય, એને ફૂલથી જુદા પાડી સૂકવી દો એટલે કેસર તૈયાર.

હા, વડોદરાના કૂદકે ને ભૂસકે વિકસી રહેલા વિસ્તાર ગોત્રીમાં વસતાં વૈભવ અને આસ્થા પટેલે પોતાના ઘરમાં કેસર ઉગાડ્યું છે. કેસરની ખેતીમાં તાપમાનનું ખૂબ મહત્ત્વ હોય છે માટે કુદરતી રીતે કશ્મીરની હાડ ગાળી નાખતી ઠંડીમાં જ કેસરની ખેતી કરવી શક્ય છે, પરંતુ જો એવું ને એટલું તાપમાન અને વાતાવરણ નિર્માણ ઘરઆંગણે કરી શકાય તો કેસરની ખેતી શક્ય છે. વૈભવ અને આસ્થાએ પણ એ રીતે પોતાના ઘરના માળે તાપમાન નિયંત્રિત રૂમનું સર્જન કરી કેસરની ખેતી શરૂ કરી છે.