પેસિવ ફંડનું મહત્ત્વ સમજો... જોખમ ઘટાડો!

રોકાણકારોને સમજદાર અને સતર્ક બનાવવાનું લક્ષ્ય શૅરબજારમાં ઈન્ડેક્સની વધ-ઘટ અને વૈશ્વિક અસરોની વચ્ચે રોકાણકારોનો રસ-ઉત્સાહ સતત વધ્યા કરે છે. આ સમયમાં ‘એનએસઈ એ તાજેતરમાં લીધેલા કેટલાક નવા ઈનિશિયેટિવ્સ અને ‘સેબી’ દ્વારા ચાલુ રહેલા રિફૉર્મ્સના પગલાની તેમ જ ટેક્નોલૉજીના કમાલની અસર બજાર પર કેવી પડી રહી છે એની ઝલક જોવા જેવી ખરી.

- જયેશ ચિતલિયા

જો તમને શૅરમાં રોકાણ કરવા બાબત મૂંઝવણ હોય, તમને શૅરનું સિલેક્શન ફાવતું ન હોય તથા શૅરરોકાણ કરવામાં તમને વધુ જોખમ પણ લાગતું હોય તો તમે શું કરો? શું શૅરબજારમાં રોકાણ જ નથી કરવું એમ મનને મનાવી બેઠા રહો.

નૅશનલ સ્ટૉક એક્સચેન્જ: પેસિવ ફંડ માટે લીપી પહેલ.

ના, એમ ન કરાય, કારણ કે શૅરબજાર અત્યારે પ્રગતિના ઉત્તમ તબક્કામાંથી પસાર થઈ રહ્યું છે, ખાસ તો છેલ્લાં પાંચ વરસમાં માર્કેટે જે વૃદ્ધિ દર્શાવી છે એ જોઈ કોઈ પણ રોકાણકારબચતકારને શૅરબજારમાં ઈન્વેસ્ટમેન્ટ કરવાનું મન થવું સ્વાભાવિક છે. ઓકે, તમે કહેશો, વાત તો સાચી, પણ કરવું શું? જેથી રાઈટ ઈન્વેસ્ટમેન્ટ થાય, જોખમ પણ નીચું રહે, એ રોકાણ વિશે સતત યોગ્ય માહિતી અને માર્ગદર્શન પણ મળતાં રહે.

આનો એક સરળ ઉપાય હમણાં નૅશનલ સ્ટૉક એક્સચેન્જ (એનએસઈએ) દાખવ્યો છે. એનએસઈએ પેસિવ ફંડ માટેની એક સંપૂર્ણ સમર્પિત વેબસાઈટ તૈયાર કરી છે, જેમાંથી ઈન્વેસ્ટમેન્ટ માટેનું માર્ગદર્શન મળતું રહી શકે છે. હવે ઘણાને સવાલ થઈ શકે કે આ પેસિવ ફંડ વળી શું છે? અને એની માહિતી મેળવીને કઈ રીતે અને શેમાં રોકાણ કરવાનું? યસ, હવે આપણે મૂળ મુદ્દા પર આવ્યા. વ્યક્તિગત સ્ટૉકમાં રોકાણ કરવાને બદલે આપણે સ્ટૉક્સના બંચ અર્થાત્ ઈન્ડેક્સમાં રોકાણ કરીએ તો એ વધુ સલામત અથવા ઓછું જોખમી રહે છે, કારણ કે એમાં માત્ર બે-ચાર પસંદગીની કંપનીના શૅર હોતા નથી, વિવિધ સેક્ટર્સના મહત્ત્વના અગ્રણી સ્ટૉક્સ હોય છે, જેને લીધે તમારું રોકાણ એકસાથે ઘણા સ્ટૉક્સમાં થઈ જાય અને વિવિધ સ્ટૉક્સને કારણે ડાઈવર્સિફાઈડ પણ થઈ જાય.

આ વેબસાઈટ શું કરે છે?

પેસિવ ફંડ વેબસાઈટ આવાં ઈન્ડેક્સ ફંડ્સ વિશેની સંપૂર્ણ માહિતી અને એમાંથી માર્ગદર્શન મળતું રહે એવી ઍનાલિસિસ આપતી રહેશે. આમાં ઈટીએફ (એક્સચેન્જ ટ્રેડેડ ફંડ)નો પણ સમાવેશ થશે. યાદ છે? એક સમયે આપણે એવી વાતો કરતા કે સાંભળતા હતા, જેમાં એવું કહેવાતું કે શૅર ન સૂઝે તો ઈન્ડેક્સમાં રોકાણ કરી દો. આ રોકાણમાર્ગ તો ક્યારનો ચાલી રહ્યો છે, પણ હવે એનએસઈના ઈનિશિયેટિવથી આ પેસિવ ફંડની વેબસાઈટ એક છત્ર હેઠળ તમને ઈટીએફ સહિત ઈન્ડેક્સ ફંડ્સની અથથી ઈતિ બધી જ માહિતી ઉપલબ્ધ કરાવે છે. એટલું જ નહીં, દરેક ફંડની કામગીરી, તુલના તેમ જ નવા ફંડ ઑફર્સની બાતમી પણ આપતી રહેશે.