અનોખી પ્રતિજ્ઞા... અખંડ શ્રદ્ધા

ગુજરાતના છેવાડાના ગામ રામગ્રીમાં એક જૈન મુનિએ જીવદયાની સમજ આપી અને એ માટે ગામલોકો પાસે પ્રતિજ્ઞા લેવડાવી, જે એક તક્તીમાં અંકિત થઈ. રામગ્રીમાં જૈનોની વસતિ નથી, પણ ગામના તમામ જૈનેતર લોકો ૭૭ વર્ષથી એ પ્રતિજ્ઞા પાળે છે. આવો જાણીએ, એક ગામની અતૂટ શ્રદ્ધાની કથા.

- મહેશ શાહ (અમદાવાદ)

ગુજરાતનાં સેંકડો ગામ અને શહેરમાં ચબૂતરા બન્યા છે. ક્યાંક પથ્થર તો ક્યાંક ધાતુના અને ક્યાંક વળી લાકડાંના. આવા ઘણા ચબૂતરા પર દાતાના નામની તક્તી જોવા મળે છે.

જાણીને આશ્ચર્ય થશે કે ગુજરાતના એક ગામના ચબૂતરા પરની તક્તીમાં દાતાના નામના બદલે પ્રતિજ્ઞાપત્ર લખ્યો છે. ના, પણ એમાં ભારત મારો દેશ છે, બધા ભારતીયો મારાં ભાઈ-બહેન છે... એ પ્રચલિત લખાણ નથી, પરંતુ આ એક અનોખો પ્રતિજ્ઞાપત્ર છે. વાંચો, એમાં શું લખ્યું છે...

રામગરી ગામે લીધેલી પ્રતિજ્ઞા. સંવત ૨૦૦૩ના ફાગણ વદ છઠ્ઠ ને ગુરુવાર.

ગેડિયાના શેઠ ગાંડાલાલ દેવશીભાઈએ સંવત ૨૦૦૨ના વૈશાખ વદ છઠ્ઠના રોજ અમદાવાદમાં પૂજ્ય આચાર્ય શ્રી ભક્તિસૂરીશ્વરજી મહારાજ પાસે દીક્ષા લીધેલી. તેઓ અત્રે પધાર્યા ત્યારે એમની દીક્ષાતિથિ પાળવાની પ્રતિજ્ઞા ગામના લોકોએ નીચે મુજબ લીધી છે.

દર વર્ષે દીક્ષાની તિથિ વૈશાખ વદ છઠ્ઠ તેમ જ ભાદરવા સુદ ચોથ તથા પાંચમ એ ત્રણેય દિવસે કોઈએ ગાડાં-હળ જોડવાં નહીં. ઘાંચીએ ઘાણી ફેરવવી નહીં. વેપારીઓએ વેપાર કરવો નહીં. કંદોઈઓએ તાવડા માંડવા નહીં. કુંભારોએ નીંભાડા પકવવા નહીં. સોની-લવારે ઘડવું નહીં. કોઈએ જીવહિંસા કરવી નહીં. ઉપરની પ્રતિજ્ઞા ગામના હિંદુ તથા મુસલમાનભાઈઓએ રાજીખુશીથી લીધી છે. એનો કોઈ પણ અનાદર કરશે એ પરમાત્માનો ગુનેગાર ગણાશે.

તારીખઃ ૧૩.૦૩.૧૯૪૭. લિ. ગામના પ્રજાજનો.

પહેલાં જાણીએ આવી અનોખી પ્રતિજ્ઞા કરાવનારા જૈન મુનિ વિશે.

નવેક દાયકા પહેલાં સુરેન્દ્રનગરના પાટડી તાલુકાના ગેડિયા ગામમાં શેઠ દેવશીભાઈનો જૈનપરિવાર વસતો. પરિવાર એક દિવસ ઉપરિયાળા જૈન તીર્થનાં દર્શને ગયો. ત્યાં આચાર્ય ભગવંત ભક્તિસૂરીશ્વરજી અને એમના શિષ્ય મુનિ વિનયવિજયજીનાં દર્શન કર્યાં. મુનિએ ધાર્મિક ઉપદેશ આપ્યો. એનો પ્રભાવ એવો પડ્યો કે શેઠના યુવાન પુત્ર ગાંડાલાલે ઘેર જઈને માતા-પિતાને કહ્યુંઃ મારે દીક્ષા લેવી છે.

બાદમાં ગાંડાલાલે સંયમ રાહપ્રેરક આચાર્ય ભક્તિસૂરીશ્વરજીની નિશ્રામાં અમદાવાદમાં વિક્રમ સંવત ૨૦૦૨ની વૈશાખ વદ છઠ્ઠના દિવસે સ્વેચ્છાએ સંસાર ત્યાગીને દીક્ષા દીધી. એ મુનિ વિનયવિજયજીના શિષ્ય મુનિ ગુણવિજયજી બન્યા.