தேர்தல் நடத்தை விதிகள் திருத்தம்! மக்களாட்சிக்கு ஆபத்து!

சமீபத்தில் நடந்த மாநில சட்டமன்றத் தேர்தல்களில் ஹரியானா, மகாராஷ்டிராவில் எதிர்பார்ப்புக்கு மாறாக பா.ஜ.க. அசாதாரண வெற்றிபெற்றது.

- க.சுப்பிரமணியன்

மகாராஷ்டிராவில் பல தொகுதிகளில் வாக்காளர் பட்டியலில் இந்தியா கூட்டணி வாக்காளர்கள் கொத்துக் கொத்தாக நீக்கப்பட்டனர் என்றும், மாறாக பா.ஜ.க. ஆதரவாளர்கள் அதிக அளவில் சேர்க்கப்பட்டனர் என்றும் அக்கூட்டணியினர் குற்றம் சுமத்தினர். மக்களவைத் தேர்தல் முடிந்த ஆறு மாத காலத்தில் 40 லட்சத்துக்கும் அதிகமான வாக்காளர்கள் புதிதாக இணைக்கப்பட்டதை காங்கிரஸ் தேர்தல் ஆணையத்துக்குச் சுட்டிக்காட்டி புகாரளித்திருந்தது.

இந்நிலையில் ஹரியானா தேர்தலிலும் பா.ஜ.க. தன் வேலையைக் காட்டியிருக்கலாம் என்ற சந்தேகமெழுந்தது. இந்நிலையில் வழக்கறிஞர் மெஹ்மூத் பிரச்சா என்பவர் 2024 ஹரியானா தேர்தலின் வீடியோ, சி.சி.டி.வி. காட்சிகள், முதற்கட்ட, இரண்டாம்கட்ட தேர்தலின் படிவம் ‘17-சி'யின் நகல்கள் ஆகியவற்றை தேர்தல் ஆணையத்திடம் கோரியிருந்தார். இதற்கெதிராக ஹரியானா உச்சநீதிமன்றத்தை அணுகிய தேர்தல் ஆணையம், பிரச்சா, தீங்குபயங்கும் எண்ணத்துடன் இந்த ஆவணங்களைக் கோரலாம் என்று கூறி அதனைத் தர மறுத்தது. மேலும் பிரச்சா, ஹரியானா தேர்தலில் பங்குபெற்ற வேட்பாளரோ, எந்தவொரு சட்டமன்றத் தொகுதியைச் சேர்ந்தவரோ அல்ல எனவும் வாதிட்டது.

பிரச்சா சார்பாக ஆஜரான வழக்கறிஞர், 1961, தேர்தல் விதிகளின்படி, வேட்பாளர் மட்டுமின்றி மற்ற எந்தவொரு நபரும் உரிய கட்டணம் செலுத்தி இந்த ஆவணங்களைப் பெறலாம் என வாதிட்டார். இதனையடுத்து நீதிபதி வினோத் எஸ்.பரத்வாஜ் ஆறு வார காலத்துக்குள் பிரச்சாவுக்கு இந்த ஆவணங்களை வழங்க உத்தரவிட்டார்.