அல்லு அர்ஜூன்...வில்லனாகிப்போதை ஹீரோ!

அல்லு அர்ஜூன் நடிப்பில் 2021ஆம் ஆண்டு வெளியான 'புஷ்பா -தி ரைஸ்' படம், தெலுங்கு சினிமாவிற்கே உரிய மசாலா ஃபார்மேட்டில் உருவாகியிருந்தது.

- கவிதாசன் ஜெ.

பெண்களை கவர்ச்சியாகக் காட்டும் ஒரு பாடல், புழுதி பறக்க நாலு ஃபைட், ரசிகர்களை விசிலடிக்க வைக்க பஞ்ச் வசனம் போன்ற அம்சங்கள் இருந்தது. இந்த படம் யாரும் எதிர்பாராத அளவிற்கு ஹிட்டடிக்க, அதன் மூலம் இந்திய அளவில் கவனம் ஈர்த்த நடிகரானார் அல்லு அர்ஜூன். இந்த வெற்றியைத் தொடர்ந்து அதன் இரண்டாம் பாகம் 'புஷ்பா 2 -தி ரூல்' என்ற தலைப்பில் 2022ஆம் ஆண்டு தொடங்கி கிட்டத்தட்ட இரண்டு வருடங்களுக்கு மேலாக படப்பிடிப்பு நடந்தது.

நாட்கள் அதிகரிக்க அதிகரிக்க ரசிகர்களுக்கு படத்தின்மீதான பெரும் எதிர்பார்ப்பு கிளம்பியது. அதற்கேற்ப ஒவ்வொரு மாநிலத்திலும் புரமோஷன் நிகழ்ச்சி நடத்திய படக்குழு,அம்மாநில ரசிகர்களை கவருவதற்கு ஏகப்பட்ட ஷயங்களை செய்தது. குறிப்பாக அல்லு அர்ஜூன் தமிழ்நாட்டில், தமிழ்மொழியை தூக்கிப் பிடித்தும், வட இந்தியாவில் அந்தந்த மாநில மொழிகளைத் தூக்கிப் பிடித்தும் புரமோஷன் செய்தார்.

இதனால் பெரும்பாலான மாநிலங்களில் இப்படத்திற்கு எதிர்பார்ப்பு மேலும் அதிகரித்தது.

தெலுங்கானாவில் படம் ரிலீஸாவதற்கு முந்தைய நாள் (04-12-2024) ஹைதராபாத்தில் உள்ள சந்தியா தியேட்டரில் சிறப்புக் காட்சி திரையிடப்பட்டது. இதில் வழக்கம்போல் ரசிகர்கள் பேனர் வைத்தும், கேக் வெட்டியும், பட்டாசு வெடித்தும் கொண்டாட்டத்தில் ஈடுபட்டனர்.

அப்போது ரசிகர்களுக்கு இன்ப அதிர்ச்சிதரும் விதமாக அல்லு அர்ஜூன் திடீரென அங்கு சென்றார். அவரை பார்த்ததும் அனைத்து கூட்டமும் அவரை நோக்கி ஓட... அந்த கூட்ட நெரிசலில் சிக்கி ரேவதி என்ற ரசிகை மயக்கமடைந்தார். அவரை மீட்டு போலீஸார் மருத்துவமனைக்கு அனுப்பி வைத்தனர். ஆனால் அந்த பெண் சிகிச்சை பலனின்றி உயிரிழந்தார்.

அவருடன் படம் பார்க்க வந்த அவரது 9 வயது மகனும் கூட்ட நெரிசலில் சிக்கி மயக்கமடைந்து கீழே விழ, அவருக்கு அருகிலிருந்த காவல் துறையினர் முதலுதவி கொடுத்து, பின்பு மருத்துவமனையில் சேர்த்தனர். பின்பு அவர் தீவிர சிகிச்சை பிரிவில் அனுமதிக்கப்பட்டார்.