నవ వసంతాల వైభవం

“సంక్షేమం, అభివృద్ధి నా ప్రభుత్వ లక్ష్యం" పరేడ్ గ్రౌండ్లో ముఖ్యమంత్రి తొలి ప్రసంగంలోని ప్రధానమైన అంశం

- - వి. ప్రకాశ్

“సంక్షేమం, అభివృద్ధి నా ప్రభుత్వ లక్ష్యం" పరేడ్ గ్రౌండ్లో ముఖ్యమంత్రి తొలి ప్రసంగంలోని ప్రధానమైన అంశం. స్వరాష్ట్రంలో తొమ్మిది సంవత్సరాల స్వయంపాలన వైభవాన్ని దశదిశలు దద్దరిల్లేలా సగర్వంగా చెప్పుకోగలిగిన ఏకైక రాష్ట్రం తెలంగాణ మాత్రమే.

'గంగా జమునా తెహజీబ్'గా చరిత్రలో నిలిచిన అప్పటి హైదరాబాద్ రాష్ట్రాన్ని విభజించిన స్టేట్స్ రీ ఆర్గనైజేషన్ కమీషన్ తెలంగాణ ప్రజల అనుమానాలను, భయాందోళనలను అర్థం చేసుకుని తెలంగాణ రాష్ట్రం కోసం సిఫార్సు చేసింది. ఆనాడే తెలంగాణ రాష్ట్రాన్ని ఏర్పాటు చేసి వుంటే ఈ రాష్ట్ర చరిత్ర మరోలా ఉండేది. కృష్ణా, గోదావరి జలాలతో లక్షలాది ఎకరాలు యాభై ఏళ్ళ క్రితమే సస్యశ్యామలమై సుభిక్షంగా వుండేవి.వందలాది విద్యార్థులు, యువత ప్రత్యేక తెలంగాణ రాష్ట్ర ఉద్యమాల్లో సమిధలై మరణించే వారు కాదు. లక్షలాది మంది భార్యా బిడ్డలను వదిలి గల్ఫ్ దేశాల బాట పట్టకపోయి వుండేవారు. లక్షలాది పాలమూరు రైతు కూలీలకు వలస పోవాల్సిన దుస్థితి వుండేదికాదు. బోర్ల కోసం అప్పులు చేయాల్సిన అవసరంగానీ, పరువు కోసం ఆత్మహత్యలు చేసుకోవాల్సిన పరిస్థితి గానీ వచ్చేది కాదు. నక్సల్బరీ, శ్రీకాకుళంలో విఫలమైన విప్లవోద్యమాల చేదు అనుభవాల తర్వాత కూడా మళ్లీ రక్తసిక్తమైన బాటనే ఎంచుకొని బూటకపు ఎన్ కౌంటర్లలో అత్యంత దారుణంగా ప్రాణాలు పోగొట్టుకోవాల్సిన స్థితి వేలాది మంది యువకులకు రాకపోయేది. మరోవైపు చదువుల మీదే ధ్యాస వుంచి అష్ట కష్టాలకోర్చి ఉన్నత విద్యనభ్యసించి మెరుగైన జీవితాల కోసం విదేశాల బాట పట్టాల్సిన అవసరం లక్షలాది తెలంగాణ విద్యావంతులకు, నిపుణులకు రాకపోయేది.