రాష్ట్రానికి ఐదు 'గ్రీన్ యాపిల్' అవార్డులు

తెలంగాణ రాష్ట్ర దశాబ్ది ఉత్సవాలు జరుపుకుంటున్న సందర్భంలోనే రాష్ట్రంలోని ఐదు నిర్మాణాలకు అంతర్జాతీయ అవార్డులు లభించాయి

- 

తెలంగాణ రాష్ట్ర దశాబ్ది ఉత్సవాలు జరుపుకుంటున్న సందర్భంలోనే రాష్ట్రంలోని ఐదు నిర్మాణాలకు అంతర్జాతీయ అవార్డులు లభించాయి.రాష్ట్ర ప్రభుత్వం ఆధ్వర్యంలో నిర్మించి, సంరక్షించిన ఐదు ప్రముఖ నిర్మాణాలకు 2023 వ సంవత్సరానికి గాను ప్రకటించిన 'గ్రీన్ యాపిల్' అవార్డులు లభించాయి. వివిధ విభాగాల్లో యాదాద్రి లక్ష్మీ నరసింహ స్వామి ఆలయంతో పాటు మరో నాలుగు నిర్మాణాలు అంతర్జాతీయ అవార్డులను దక్కించుకున్నాయి.లండన్లో జరిగిన అవార్డుల ప్రదానోత్సవంలో మున్సిపల్, పట్టణాభివృద్ధి శాఖ ప్రత్యేక ప్రధాన కార్యదర్శి అర్వింద్కుమార్ ఈ అవార్డులను అందుకున్నారు. దేశంలోని నిర్మాణాలు ఈ ప్రతిష్టాత్మక అవార్డులను అందుకోవడం ఇదే తొలిసారి.

గ్రీన్ యాపిల్ అవార్డుల పేరుతో 2016 నుంచి ప్రతి ఏటా ప్రముఖ సంస్థలు, కౌన్సిళ్లు, కమ్యూనిటీలను గుర్తిస్తూ వాటికి గ్రీన్ ఆర్గనైజేషన్ అవార్డులను ప్రదానం చేస్తున్నది ఈ సంస్థ. లండన్లో 1994లో ఏర్పాటైన గ్రీన్ ఆర్గనైజేషన్ ఎటువంటి లాభాపేక్షలేని ఒక స్వతంత్ర సంస్థ. ప్రపంచవ్యాప్తంగా పర్యావరణహిత కార్యక్రమాలను ఇతోధికంగా పోత్సహించడంతోపాటు, ఇటువంటి విధానాలను పాటిస్తున్న వాటికి సరైన గుర్తింపును ఇస్తుంది.

యావత్ భారతదేశంలో, ఐదు విభాగాల్లోనూ ఒక్క తెలంగాణ రాష్ట్రానికే ఈ అవార్డులు రావడం వల్ల తెలంగాణ ఖ్యాతి విశ్వవ్యాప్తమయ్యింది. తెలంగాణ ప్రభుత్వం సాధించిన విజయాల ఆధారంగా, ప్రపంచ గుర్తింపు, ప్రాజెక్టులు, విధానాలను అధ్యయనం చేసి ఈ అవార్డులను అందించారని ఆర్వింద్కుమార్ తెలిపారు. గతంలో హైదరాబాద్కు దక్కిన వరల్డ్ గ్రీన్ సిటీ అవార్డ్ (2022), ట్రీ సిటీ ఆఫ్ ది వరల్డ్ అవార్డ్ (2021), లివింగ్ అండ్ ఇన్క్లూజన్ అవార్డ్ - స్మార్ట్ సిటీ ఎక్స్పో వరల్డ్ కాంగ్రెస్ (2021) అవార్డులతో ప్రపంచవ్యాప్త గుర్తింపు వచ్చిందని పేర్కొన్నారు. ప్రస్తుతం 5 వేర్వేరు విభాగాల్లో 5 అవార్డులను అందుకొన్నామని, అత్యధిక అవార్డులు తెలంగాణకే దక్కాయని వివరించారు.