அதிமுக பொதுச் செயலர் எடப்பாடி பழனிசாமி

தேர்தல் ஆணையம் அங்கீகாரம்

அதிமுக பொதுச் செயலராக எடப்பாடி கே.பழனிசாமியை அங்கீகரித்து இந்திய தேர்தல் ஆணையம் வியாழக்கிழமை அறிவிப்பு வெளியிட்டது.

கட்சியில் திருத்தப்பட்ட சட்ட விதிகள், நிர்வாகிகள் மாற்றம் ஆகியவற்றுக்கும் தேர்தல் ஆணையம் ஒப்புதல் அளித்தது.

அதிமுகவில் ஒற்றைத் தலைமை கோரிக்கை எழுந்ததால் ஒருங்கிணைப்பாளர் - இணை ஒருங்கிணைப்பாளர் பதவியை ரத்து செய்துவிட்டு மீண்டும் பொதுச் செயலர் பதவியைக் கொண்டுவர வேண்டும் என்பது உள்பட பல்வேறு தீர்மானங்கள் 11.7.2022இல் நடைபெற்ற அதிமுக பொதுக் குழுவில் நிறைவேற்றப்பட்டன.

மேலும், ஒருங்கிணைப்பாளராக இருந்த ஓ.பன்னீர்செல்வம் மற்றும் அவரது ஆதரவாளர்கள் கட்சியில் இருந்து நீக்கப்பட்டனர்.

இதை எதிர்த்து ஓ.பன்னீர்செல்வம் தரப்பில் தாக்கல் செய்த மனுவுக்கு ஆதரவாக சென்னை உயர்நீதிமன்றத் தனி நீதிபதி தீர்ப்பு அளித்தாலும், உயர்நீதிமன்ற இரு நீதிபதிகள் அமர்வு, பொதுக்குழு செல்லும் என அறிவித்தது.

இதை உச்சநீதிமன்றமும் உறுதி செய்ததுடன் பொதுக் குழுவில் நிறைவேற்றப்பட்ட தீர்மானங்கள் குறித்து உயர்நீதிமன்றம் முடிவு செய்யும் என அறிவித்தது.

இது தொடர்பாக ஓ.பன்னீர்செல்வம் தரப்பினர் செய்த முறையீடு வழக்கை விசாரித்த சென்னை உயர்நீதிமன்றத் தனி நீதிபதி, பொதுக் குழு தீர்மானங்கள் செல்லும் என மார்ச் 28-ஆம் தேதி உத்தரவிட்டார். இதை எதிர்த்து மீண்டும் ஓ.பன்னீர்செல்வம் தரப்பினர் செய்த மேல்முறையீடு வழக்கு உயர்நீதிமன்ற இரு நீதிபதிகள் அமர்வில் விசாரணையில் உள்ளது.