கர்நாடக முதல்வர் சித்தராமையா, துணை முதல்வர் டி.கே.சிவகுமார்

நாளை பதவியேற்பு

ஐந்து நாள்கள் இழுபறிக்குப் பிறகு, கர்நாடக மாநிலத்தின் முதல்வராக சித்தராமையாவையும், துணை முதல்வராக டி.கே.சிவகுமாரையும் காங்கிரஸ் மேலிடம் வியாழக்கிழமை அதிகாரபூர்வமாக அறிவித்தது.

கர்நாடகத்தின் 24-ஆவது முதல்வராக சனிக்கிழமை (மே 20) நண்பகல் 12.30 மணிக்கு சித்தராமையா பதவியேற்க இருக்கிறார். அவருடன் டி.கே.சிவகுமார் துணை முதல்வராக பதவியேற்கிறார்.

135 இடங்களில் வெற்றி: மே 10-ஆம் தேதி நடைபெற்ற கர்நாடக சட்டப்பேரவைத் தேர்தலில் காங்கிரஸ் 135 இடங்களைக் கைப்பற்றி ஆட்சி அமைக்க அறுதிப் பெரும்பான்மை பலத்தைப் பெற்றது.

மே 14ஆம் தேதி மாநிலத் தலைவர் டி.கே.சிவகுமார் தலைமையில் நடைபெற்ற புதிதாகத் தேர்ந்தெடுக்கப்பட்ட எம்எல்ஏக்கள் கூட்டத்தில், சட்டப்பேரவை கட்சித் தலைவரைத் தேர்ந்தெடுத்து அறிவிக்கும் அதிகாரத்தை காங்கிரஸ் தலைவர் மல்லி கார்ஜுன கார்கேவுக்கு அளிக்கும் தீர்மானம் நிறைவேற்றப்பட்டது.

அதைத் தொடர்ந்து, காங்கிரஸ் கட்சியின் சட்டப்பேரவை கட்சித் தலைவராக யாரைத் தேர்ந்தெடுப்பது என்பதை அறிய எம்எல்ஏக்களிடையே ரகசிய வாக்கெடுப்பு நடத்தப்பட்டது. அதில் பெரும்பான்மையான எம்எல்ஏக்கள் சித்தராமையாவுக்கு ஆதரவு தெரிவித்தனர்.

தில்லியில் இழுபறி: முதல்வர் பதவியை யாருக்கு வழங்குவது என்பது குறித்து விவாதிக்க சித்தராமையா, டி.கே.சிவகுமார் ஆகியோரை தில்லிக்கு வருமாறு தில்லி மேலிடம் அழைப்பு விடுத்தது.

கடந்த மே 15-ஆம் தேதி சித்தராமையா தில்லி சென்றார். ஆனால், சித்தராமையாவை முதல்வராக்கும் திட்டத்துக்கு இணங்க விருப்பமில்லாத டி.கே.சிவகுமார், உடல்நலக்குறைவைக் காரணம் காட்டி பெங்களூரிலேயே தங்கினார்.