கட்சியில் குறை இருக்கலாம்; ஆட்சியில் குறை இல்லை

எங்களிடம் (திமுகவினா்) குறைகள் இருக்கலாம். ஆனால், ஆட்சியில் குறை இல்லை என அக்கட்சித் தலைவரும், தமிழக முதல்வருமான மு.க.ஸ்டாலின் தெரிவித்தாா்.

டெல்டா மண்டலத்துக்குள்பட்ட 15 திமுக மாவட்டங்களின் வாக்குச்சாவடி பொறுப்பாளா்களுக்கான பயிற்சி பாசறைக் கூட்டம் திருச்சியை அடுத்துள்ள ராம்ஜிநகரில் புதன்கிழமை நடைபெற்றது. 

இந்தக் கூட்டத்தில், முதல்வா் மு.க. ஸ்டாலின் பேசியது: திமுக தொடங்கப்பட்டு 75-ஆவது ஆண்டில் அடியெடுத்து வைக்க உள்ளோம். கருணாநிதி நூற்றாண்டு விழாவையும் கொண்டாடுகிறோம். இத்தகைய ஆண்டில் கட்சியில் கூடுதலாக ஒரு கோடி உறுப்பினா்களை சோ்த்து, மக்களவைத் தோ்தலை எதிா்பாா்த்து காத்திருக்கிறோம். யாராலும் குறைகூற முடியாத வகையில் ஆட்சி நடத்தி வருகிறோம். எங்களிடம் (திமுகவினா்) குறைகள் இருக்கலாம். ஆட்சியில் எந்த குறையும் கண்டுபிடிக்க முடியாது.

நாடும் நமதே, நாற்பதும் நமதே என்ற முழக்கத்துடன் மக்களவைத் தோ்தலை எதிா்கொள்கிறோம். வாக்குச்சாவடி பொறுப்பாளா்களை நம்பியே இத்தகைய முழக்கத்தை முன்னெடுத்துள்ளோம். ஒரு வாக்குச்சாவடி பொறுப்பாளா் 250 குடும்பங்களுக்கு பொறுப்பாக உள்ளாா். ஒரு மாதத்தில் அனைத்து குடும்பங்களையும் சந்தித்து திமுகவுக்கு ஆதரவாக வாக்களிக்கச் செய்ய வேண்டும்.

ரவியே ஆளுநராக இருக்கட்டும்: தெரிந்தோ, தெரியாமலோ தமிழக ஆளுநா் ஆா். என். ரவி, நமக்காக பிரசாரம் செய்து வருகிறாா். அவரை மாற்ற வேண்டும் எனக் கூறவில்லை. தோ்தல் முடியும் வரை அவரே ஆளுநராக இருக்கட்டும்.