வயநாட்டில் தொடரும் மீட்புப் பணிகள்

உயிரிழப்பு 300-ஐ நெருங்கியது

கேரள, மாநிலம், வயநாட்டில் ஏற்பட்ட நிலச்சரிவில் உயிரிழந்தோா் எண்ணிக்கை வியாழக்கிழமை 300-ஐ நெருங்கியது. அங்கு மூன்றாவது நாளாக மீட்புப் பணிகள் தொடா்ந்தன.

சூரல்மலையில் காட்டாற்றின் குறுக்கே ராணுவம் கட்டி வந்த தற்காலிக இரும்புப் பாலம் நிறைவடைந்த நிலையில், முண்டக்கை பகுதிக்கு கனரக வாகனங்களில் கொண்டு செல்லப்பட்ட நவீன இயந்திரங்கள் உதவியுடன் மேலும் பல உடல்கள் கண்டெடுக்கப்பட்டன.

இதுவரை 256-க்கும் மேற்பட் உடல்கள் கூறாய்வு செய்யப்பட்டுள்ளதாகவும், உயிரிழந்தவா்களின் எண்ணிக்கையை இறுதி செய்யும் பணியில் அதிகாரிகள் ஈடுபட்டுள்ளதாகவும் மாநில நிா்வாகம் தெரிவித்தது. வியாழக்கிழமை நிலவரப்படி உயிரிழந்தோா் எண்ணிக்கை 297 என தகவலறிந்த வட்டாரங்கள் தெரிவித்தன.

கேரளத்தின் வடக்கே அமைந்த மலைப்பாங்கான வயநாடு மாவட்டத்தில் தொடா் கனமழையால் செவ்வாய்க்கிழமை அதிகாலை பெரும் நிலச்சரிவுகள் ஏற்பட்டன. இதனால் முண்டக்கை, சூரல்மலை, அட்டமலை, நூல்மலை ஆகிய மலைக் கிராமங்களில் நூற்றுக்கணக்கான மக்கள் உயிரோடு மண்ணில் புதைந்தனா்.

மலைப் பகுதியில் இருந்து பெரிய பாறைகளுடன் மண்ணும் கலந்துவந்த வெள்ளத்தில் சாலைகள், பாலங்கள், வாகனங்கள், மரங்கள் உள்ளிட்டவை முழுவதுமாக அடித்துச் செல்லப்பட்டன.

ராணுவம், கடற்படை, விமானப் படை, தேசியப் பேரிடா் மீட்புப் படை, கடலோரக் காவல் படை, காவல் துறை, தீயணைப்புத் துறை உள்பட பல்வேறு முகமைகளைச் சோ்ந்தவா்கள் மீட்பு-தேடுதல் பணியில் ஈடுபட்டுள்ளனா்.

தற்காலிக பாலம் அமைப்பு: நிலச்சரிவால் கடுமையாகப் பாதிக்கப்பட்டு, முழுவதுமாக துண்டிக்கப்பட்ட முண்டக்கையில் மண்ணின் ஈரப்பதம் அதிகம் இருப்பதாலும், போதுமான உபகரணங்கள் இல்லாததாலும் உடல்களை மீட்பதில் தாமதம் ஏற்படுவதாக களத்திலுள்ள மீட்புப் படை வீரா் ஒருவா் கூறினாா்.