தடை செய்யப்பட்ட வலைகளுடன் தூத்துக்குடி மீனவர்கள் சிறைபிடிப்பு

ராமநாதபுரம் மாவட்டம், சாயல்குடி அருகே தடை செய்யப்பட்ட சுருக்குமடி வலைகளுடன் மீன்பிடித்த தூத்துக்குடி மாவட்ட மீனவர்கள் 23 பேரை சாயல்குடி மீனவர்கள் ஞாயிற்றுக்கிழமை சிறைபிடித்தனர்.

ராமநாதபுரம் மாவட்டம், சாயல்குடியை அடுத்த ரோஸ்மாநகர் கடற்கரை அருகே அரசால் தடை செய்யப்பட்ட இரட்டைமடி, சுருக்குமடி வலைகளைப் பயன்படுத்தி, தூத்துக்குடி மாவட்ட மீனவர்கள் மீன்பிடிப்பதாக சாயல்குடி ரோஸ்மா நகர் பகுதி மீனவர்களுக்கு தகவல் கிடைத்தது. இதையடுத்து, ரோஸ்மாநகர் பகுதி மீனவர்கள் தங்களது படகுகளில் சென்று 2 படகுகளில் மீன்பிடித்துக்கொண்டிருந்த தூத்துக்குடி மாவட்ட மீனவர்கள் 23 பேரை சிறைபிடித்து கரைக்கு கொண்டு வந்தனர்.

இதைத் தொடர்ந்து, ரோஸ்மாநகர் கடற்கரை கிராமத்தில் மூக்கையூர், ரோஸ்மாநகர் பகுதி மீனவர்களுக்கும், தூத்துக்குடி மாவட்ட மீனவர்களுக்கும் இடையே வாக்குவாதம் ஏற்பட்டது.