ஃபென்ஜால் புயல்: தமிழகத்துக்கு ரூ.944 கோடி

மத்திய உள்துறை அமைச்சகம் ஒப்புதல்

- நமது சிறப்பு நிருபர்

நமது சிறப்பு நிருபர் புது தில்லி, டிச. 6:ஃபென்ஜால் புயல் பாதிப்புக்கு உதவுவதற்காக மாநில பேரிடர் நிவாரண நிதியிலிருந்து (எஸ்.டி.ஆர்.எஃப்.) மத்திய அரசின் பங்காக ரூ.944.80 கோடியை தமிழக அரசுக்கு விடுவிக்க மத்திய உள்துறை அமைச்சகம் வெள்ளிக்கிழமை ஒப்புதல் அளித்தது.

தமிழகத்தில் கடந்த நவம்பர் 30 முதல் வீசிய ஃபென்ஜால் புயலால் மாநிலத்தின் கடலோர மாவட்டங்கள் மற்றும் வட மாவட்டங்கள் கடுமையாகப் பாதிக்கப்பட்டன.

விழுப்புரம், கடலூர், கள்ளக்குறிச்சி ஆகிய மாவட்டங்களின் புயலின் தாக்கம் கடுமையாகவும் திருவண்ணாமலை, தருமபுரி, கிருஷ்ணகிரி உள்பட 14 மாவட்டங்களில் வழக்கத்தைவிட மழை கடுமையாகவும் பெய்தது.

இந்த மாவட்டங்களில் சாலைகள், பாலங்கள், மின்கம்பங்கள், மின்மாற்றிகள், கட்டடங்கள் போன்ற உள்கட்டமைப்பு வசதிகள் கடுமையான சேதத்தை எதிர்கொண்டன.

இதற்கிடையே, பாதிக்கப்பட்ட குடும்பங்களில் உயிரிழந்தவர்களுக்கு இழப்பீடு, வீடு கட்டும் திட்டத்தில் முன்னுரிமை, பயிர்கள், கால்நடைகளுக்கு இழப்பீடு, பாதிக்கப்பட்டவர்களுக்கு நிவாரண நிதி உள்ளிட்ட அறிவிப்புகளை முதல்வர் மு.க. ஸ்டாலின் டிச. 3-ஆம் தேதி வெளியிட்டார்.

இதைத் தொடர்ந்து, புயலால் பாதிக்கப்பட்ட 14 மாவட்டங்களில் மீட்பு மற்றும் நிவாரணப் பணிகளை மேற்கொள்ள ஏதுவாக மத்திய அரசு இடைக்காலமாக ரூ. 2,000 கோடி வழங்க வேண்டும் என்று பிரதமர் நரேந்திர மோடிக்கு முதல்வர் மு.க. ஸ்டாலின் கடிதம் எழுதினார்.

இந்த விவகாரத்தை நாடாளுமன்றத்தின் இரு அவைகளிலும் தமிழக எம்.பி.க்கள் எழுப்பி விரைவாக மத்திய குழுவை அமைக்க வேண்டும் என்றும் வலியுறுத்தினர்.