வாஜ்பாயின் 100-ஆவது பிறந்த தினம்: தலைவர்கள் மரியாதை

முன்னாள் பிரதமர் வாஜ்பாயின் 100-ஆவது பிறந்த தினத்தையொட்டி தில்லியில் உள்ள அவரது நினைவிடத்தில் குடியரசுத் தலைவர் திரௌபதி முர்மு, குடியரசு துணைத் தலைவர் ஜகதீப் தன்கர், பிரதமர் நரேந்திர மோடி உள்ளிட்டோர் மரியாதை செலுத்தினர்.

கடந்த 1924, டிசம்பர் 25-இல் குவாலியர் மாகாணத்தில் (இப்போதைய மத்திய பிரதேசம்) பிறந்த வாஜ்பாய், பாஜகவின் நிறுவனத் தலைவர்களில் ஒருவர். 1996-இல் 13 நாள்கள், 1998-1999 காலகட்டத்தில் 13 மாதங்கள், 1999-2004 என மூன்று முறை பிரதமராக பதவி வகித்தவர். தனது முழு காலத்தையும் நிறைவுசெய்த காங்கிரஸ் அல்லாத முதல் பிரதமர் என்ற பெருமைக்குரியவர். சிந்தாந்த வேறுபாடுகளைக் கடந்து, பல்வேறு கட்சியினரால் ஈர்க்கப்பட்டவர். நாட்டை கட்டமைப்பதில் வலுவான தலைவராக திகழ்ந்த இவருக்கு 2015-இல் நாட்டின் உயரிய பாரத ரத்னா விருது வழங்கப்பட்டது. 2018-இல் வயது மூப்பு சார்ந்த உடல் நலப் பிரச்னைகளால் காலமானார்.