மறந்துபோன பழக்க வழக்கங்கள்!

சமூகத்தில் நாகரிக வளர்ச்சிக்கும், மாற்றத்திற்கும் ஏற்ப மக்களின் நடை, உடை, பாவனை என அனைத்தும் மாறிவருகின்றன.

- பெ. சுப்ரமணியன்

இவ்வகையான மாற்றங்கள் எப்போதும் நகரங்களைக் காட்டிலும் கிராமங்களில் காலங் கடந்தே நிகழ்ந்தன. இன்று தொலைத்தொடர்பு சாதனங்களின் வரவு, நகரங்களை நோக்கிய பயணம், நகர்ப்புற மக்களுடனான பழக்கங்கள் போன்ற காரணங்களால் நகரங்களுக்கு இணையாக கிராமங்களிலும் மாற்றங்கள் ஏற்பட்டு வருகின்றன.

அன்றைய காலகட்டத்தில் மருத்துவமனைகளில் குழந்தை பிறப்பு என்பது குறைவாக இருந்தது. பெரும்பாலான பிரசவங்கள் வீடுகளிலேயே நடந்தன. குழந்தை பிறந்ததும் அக்கம்பக்கத்தில் உள்ளவர்களுக்கு தகவல் தெரிவிப்பதும், இனிப்புகள் வழங்குவதும் மட்டுமே வழக்கமாக இருந்தது. அப்போதெல்லாம் நேரில் சென்று நலம் விசாரிப்பதுடன் முடிந்துவிடும். பின்னர் பார்க்கும்போது குழந்தை தவழ்கிறதா, நடக்கிறதா என்று விசாரிப்பது மட்டுமே வழக்கமாக இருந்தது. பிறந்த நாள் விழா கொண்டாடுவது என்பதெல்லாம் இருந்ததில்லை. ஆனால், இன்று கிராமங்களிலும் பிறந்த நாள் விழா விமரிசையாகக் கொண்டாடப்படுகிறது.

அடுத்தாற்போன்று, ஒரு பெண் பூப்பெய்தியதும் நெருங்கிய உறவினர்களுக்கு மட்டும் தகவல் தெரிவித்து சடங்கு, சம்பிரதாயங்கள் நடத்துவதுடன் முடிந்துவிடும். ஆனால், இன்று மஞ்சள் நீராட்டு விழா என்ற பெயரில் அழைப்பிதழ்கள் அச்சிடப்பட்டு மண்டபங்களில் சைவ, அசைவ உணவுகளுடன் விழா நடத்துகின்றனர். இதில் குறிப்பிடத்தக்க விஷயம் என்னவெனில், பூப்பெய்தி இரண்டாண்டுகளுக்குப் பின்னர் கூட இவ்விழா நடத்தப்படுகிறது.