દારૂની ફરિયાદ મળી અને કાર્યવાહી ના કરી તો પોલીસકર્મીએ સસ્પેન્ડ થવું પડશે

કેમિકલકાંડ બાદ દારૂબંધી પર પોલીસની પોલ ખુલ્લી પડતાં તંત્ર એકશન મોડ પર: કેટલાક ભ્રષ્ટ પોલીસ કર્મચારીઓ બુટલેગરને સપોર્ટ કરતા હોય છે

અમદાવાદ, ગુરુવાર

ગુજરાતમાં દારૂબંધી માત્ર કાગળ પર હોય તેવું લાગી રહ્યું છે કારણ કે પોલીસ ચોપડે નોંઘાયેલા અધિકૃત આંકડા ઘણું બધું કહી બતાવે છે. પોલીસ જેટલો દારૂ પકડે છે તેનાં કરતાં ચાર ગણો વધુ દારૂ બુટલેગરો વેચી રહ્યા છે. ભ્રષ્ટ પોલીસકર્મીઓની છત્રછાયા વગર અમદાવાદ સહિત ગુજરાતમાં દારૂનો ધંધો કરવો શક્ય નથી. બોટાદ જિલ્લા તેમજ અમદાવાદ જિલ્લામાં થયેલા કેમિકલકાંડ બાદ પોલીસ સફાળી જાગી છે. જો કોઇ જાગૃત નાગરિક દારૂના અડ્ડા મામલે ફરિયાદ કરશે અને પોલીસ કર્મચારી કોઇ કાર્યવાહી નહીં કરે તો તેને સસ્પેન્ડ થવાના પણ વારો આવશે. પોલીસની આબરૂના ધજાગરા થાય નહીં તે માટે આ મહત્વપૂર્ણ નિર્ણય લેવામાં આવ્યો છે, કારણ કે કેમિકલકાંડના ચાર મહિના પહેલાં રોજીદ ગામના સરપંચે બરવાળા પોલીસને લેખિતમાં ફરિયાદ કરી હતી.