ફૂટ ઓવરબ્રિજની રોનક માણવા રૂ. ૨૦થી ૫૦ની એન્ટ્રી ફી ચૂકવવાની તૈયારી રાખજો

વડા પ્રધાન નરેન્દ્ર મોદીના હસ્તે શહેરના નવા આકર્ષણ સમા બ્રિજનું ઉદ્ઘાટન કરાવવા મ્યુનિસિપલ તંત્ર દ્વારા આમંત્રણ અપાઈ ચૂક્યું છેઃ સ્પોર્ટ્સ કોમ્પ્લેક્સનું પણ તેમના હસ્તે લોકાર્પણ કરાય તેવી શક્યતા

અમદાવાદ, શુક્રવાર

સાબરમતી નદી પરનો આઇકોનિક ફૂટ ઓવરબ્રિજ અત્યારથી હજારો અમદાવાદીઓને આકર્ષી રહ્યો હોઈ તે લોકો માટે સેલ્ફી પોઇન્ટ પણ બન્યો છે. રિવરફ્રન્ટના પશ્ચિમ કાંઠાને પૂર્વ કાંઠા સાથે જોડનારા આ નયનરમ્ય બ્રિજને અન્ય રિવરબ્રિજ પરથી નિહાળીને નાગરિકો મંત્રમુગ્ધ થઈ રહ્યા છે. જોકે આ ફૂટ ઓવરબ્રિજની રોનક માણવા માટે મુલાકાતીઓએ એન્ટ્રી ફી ચૂકવવી પડશે. હાલમાં વ્યક્તિદીઠ રૂ. ૨૦થી ૫૦ની એન્ટ્રી ફી લેવાશે તેવી શક્યતા ચર્ચાઈ રહી છે.

મ્યુનિ. તંત્ર દ્વારા સાબરમદી નદીની સુંદરતામાં વધારો કરવા ફૂટ ઓવરબ્રિજનું નિર્માણ કરાયું છે. આ ફૂટ ઓવરબ્રિજના નિર્માણ પાછળ મ્યુનિ. તિજોરીમાંથી રૂ. ૭૪.૩૦ કરોડ ખર્ચાયા છે. સાબરમતી નદીના બંને કાંઠે મ્યુનિ. સત્તાવાળાઓએ કરોડો રૂપિયાના ખર્ચે રિવરફ્રન્ટ પ્રોજેક્ટ તૈયાર કરાયા બાદ હવે આ રિવરફ્રન્ટ દેશ-વિદેશમાં પણ પ્રસિદ્ધ થયો છે. સેંકડો લોકો સાંજ પડતાંની સાથે રિવરફ્રન્ટમાં લટાર મારવા જાય છે. જોકે રિવરફ્રન્ટમાં બાગબગીચા, ઈવેન્ટ સેન્ટર, બોટિંગ, સાઇકલિંગ જેવી ઇતર પ્રવૃત્તિઓનો પણ ધમધમાટ છે.