ફેંગલ વાવાઝોડાએ ભયાનક તબાહી મચાવીઃ ભારત શ્રીલંકામાં ૧૯ લોકોનાં મોત, પૂચેરીમાં પૂરની સ્થિતિ

પુડુચેરી, કુડ્ડલોર, વિલુપુરમ્-ચેન્નઈમાં ભારે વરસાદની આગાહી, ભૂસ્ખલનનું જોખમ

દક્ષિણ ભારતમાં ચક્રવાતી તોફાન ફેંગલે ભયાનક તબાહી મચાવી છે. ભારતીય હવામાન વિભાગે આજે કેરળના ચાર જિલ્લામાં અતિ ભારે વરસાદનું રેડ એલર્ટ જારી કર્યું છે. ફેંગલના કારણે પુડુચેરી અને તામિલનાડુમાં મુશળધાર વરસાદ ખાબક્યો છે અને જનજીવન પ્રભાવિત થયું છે. બીજી તરફ ભારત અને શ્રીલંકામાં અત્યાર સુધીમાં ફેંગલના કારણે ૧૯ લોકોએ જીવ ગુમાવ્યા છે. મૃતકોમાં શ્રીલંકાના ૧૫ અને ચેન્નઈના ત્રણ લોકોનો સમાવેશ થાય છે.

બંગાળની ખાડીમાંથી ઉદ્ભવેલા તોફાન ફેંગલ વાવાઝોડાએ વિનાશ વેર્યા બાદ હવે નબળું પડીને ડીપ ડિપ્રેશનમાં ફેરવાઈ ગયું છે, પરંતુ તેની અસર ઘણાં રાજ્યોમાં જોવા મળી રહી છે. પુડુચેરીમાં એક દિવસમાં સૌથી વધુ વરસાદ થયો છે. કુડ્ડલોર, વિલ્લુપુરમ્ અને ચેન્નઈ ઉપરાંત કેરળના ઘણા જિલ્લાઓમાં આગામી ત્રણ દિવસમાં ભારે વરસાદની ચેતવણી જારી કરવામાં આવી છે.