ઠંડી ફરીથી ટોપ ગિયરમાં નલિયામાં ૬.૫, રાજકોટમાં ૧૦.૮, અમદાવાદમાં ૧૧.૮ ડિગ્રી ઠંડી

અમદાવાદમાં વહેલી સવારે ગાઢ ધુમ્મસ સાથે ઠંડાગાર પવતો ફૂંકાતાં શહેરીજનો થથરી ઊઠ્યા

બે દિવસની સામાન્ય રાહત બાદ આજે સવારે ઠંડી ટોપ ગિયરમાં ફરી વળી છે. કચ્છના નલિયામાં આજે સવારે ૬.૫ ડિગ્રી, જ્યારે સૌરાષ્ટ્રના રાજકોટમાં ૧૦.૮ ડિગ્રી અને અમદાવાદ શહેરમાં ૧૧.૮ ડિગ્રી ઠંડી નોંધાતાં લોકો ધ્રૂજી ઊઠ્યા હતા. ખાસ કરીને અમદાવાદમાં આજે વહેલી સવારે ગાઢ ધુમ્મસની ચાદર છવાઈ ગઈ હતી અને ઠંડાગાર પવનો ફૂંકાતાં શહેરીજનો થથરી ઊઠ્યા હતા. કડકડતી ઠંડીના આકરા પ્રકારના કારણે આજે અમદાવાદમાં વહેલી સવારે મોર્નિંગ વોક માટે નીકળતા લોકોની સંખ્યામાં પણ દેખીતો ઘટાડો જોવા મળ્યો હતો.

હવામાન વિભાગ અને ટોચના હવામાન નિષ્ણાતોની આગાહી સ્પષ્ટપણે જણાવે છે કે ડિસેમ્બર મહિનાનો અંત અમદાવાદ સહિતના રાજ્યના મોટા ભાગના વિસ્તારો માટે કડકડતી ઠંડીવાળો બની રહેશે. વર્ષ ૨૦૨૪ની વિદાય અને નવા વર્ષ ૨૦૨૫નું આગમન પણ કાતિલ ઠંડી વચ્ચે થાય તેવું અનુમાન છે.