தேவாலயக் கத்திக்குத்துச் சம்பவத்திற்கு சிங்கப்பூர் சமய அமைப்புகள் கண்டனம்

அப்பர் புக்கிட் தீமாவில் உள்ள செயின்ட் ஜோசஃப் தேவாலயத்தில் (படம்) பாதிரியார் ஒருவர் தாக்கப்பட்டதற்குச் சிங்கப்பூரில் உள்ள சமய அமைப்புகள் கண்டனம் தெரிவித்துள்ளன.

வழிபாட்டு இடங்களில் வன்முறை சகித்துக்கொள்ளப்படாது என்று அவை எடுத்துரைத்தன.

சனிக்கிழமை (நவம்பர் 9) 57 வயதுப் பாதிரியார் கிறிஸ்டஃபர் லீ கத்திக்குத்துக்கு ஆளானார்.

சந்தேகத்தின் பேரில், சிங்கப்பூரரான 37 வயது சிங்கள ஆடவர் கைது செய்யப்பட்டார்.

அதைத் தொடர்ந்து 10 சமயங்களைப் பிரதிநிதிக்கும் சமயங்களுக்கு இடையிலான அமைப்பு (ஐஆர்ஓ) கண்டனம் தெரிவித்துள்ளது.

அமைப்பு, கிறிஸ்துவ, இந்து, இஸ்லாமிய, யூத, சீக்கிய, தாவோயிஸ்ட், ஸோரொவேஸ்திரிய, பௌத்த, பாஹாய் சமயங்களைப் பிரதிநிதிக்கிறது.

சம்பவம் தங்களுக்கு மிகுந்த வருத்தம் தருகிறது என்றும் நமது சமூகத்தில், குறிப்பாக அமைதி தரும் புனிதமான இடங்களில் வன்முறைக்கு இடம் கிடையாது என்றும் இந்து அறக்கட்டளை வாரியமும் இந்து ஆலோசனை மன்றமும் செய்தி அறிக்கை ஒன்றில் குறிப்பிட்டன.

சிங்கப்பூரின் இஸ்லாமிய சமயத் தலைவரான டாக்டர் நஸிருத்தீன் முகம்மது நாசர், சிங்கப்பூரின் எல்லா வழிபாட்டு இடங்களின் புனிதத்தையும் பாதுகாப்பையும் காப்பதுடன் ஒவ்வொரு சமயமும் போதிக்கும் அமைதிக் கல்வியை வலியுறுத்துவதில் கத்தோலிக்க மற்றும் அனைத்து சமயத்தினருடனும் தாங்கள் ஒன்றுபட்டு நிற்பதாக இன்ஸ்டாகிராமில் பதிவிட்டார்.

இந்தச் சவாலான நேரத்தில் கத்தோலிக்க சமயத்தைச் சேர்ந்த சகோதர, சகோதரிகளுடன் தாங்கள் ஒன்றுபட்டு நிற்பதாக சீக்கிய ஆலோசனை மன்றம் சொன்னது.