ఎక్కడిదీ శివశక్తి గంగావతరణం..

సాహిత్యం

- జయసూర్య

కవి సమ్రాట్ విశ్వనాథవారికి, . నేను స్వయంగా రచించిన న గంగావతరణం చదివి వినిపించి వారి స్పందన కళ్లారా చూడాలని మా సహజన్ములం అందరం విజయవాడలో వారి ఇంటికి వెళ్లాం.

నా ఆధునిక వేషధారణ చూసిన విశ్వనాథవారు వినటానికి కూడా ఆసక్తి చూపలేదు.

"అక్కడ పెట్టి వెళ్లండి.నేను తీరికగా చదువుతా” అన్నారు నిరాసక్తంగా.

మా ముఖాలలో నిరాశ నిస్పృహలు చూసి “సరే..బాగా రాశాననుకున్నవి పది పంక్తులు చదివితే వింటా" నన్నారు.చేతికొచ్చిన పేజీ తెరచి గబగబా నాలుగు కప్లెట్సు చదివాను.

ఆపమని, ఆది నుంచి మళ్లీ నిదానంగా చదవమన్నారు.సంభ్రమాశ్చర్యాలను అణచుకొంటూ మొదటి నుంచి చదువుతుంటే ఆ మహాకవి అక్కడే వున్న శిష్యవర్గంతో ఆ కావ్య పద్యాలలోని శయ్య, శిల్పం, శబ్దగాంభీర్యం, అల్లిక, తెనుగు నుడికారం అంటూ శ్లాఘించడం మాకు హర్షాతిరేకం కలిగించింది. నా మానసిక స్థితి మాటలలో చెప్పలేని స్థాయికి చేరింది. చివరివరకూ కవి సమ్రాట్ నా కావ్యం వినడం మమ్మల్ని ఆరోజు ఆనంద జలధిలో ముంచింది.