ആയില്യം നക്ഷത്രത്തിന്റെ ദേവതകൾ

സർപ്പക്കാവുള്ള തറവാടുകളിൽ വർഷത്തിലൊരു ദിവസം നൂറും പാലും വഴിപാട് നടത്താറുണ്ട്

- ബാബുരാജ് പൊറത്തിശ്ശേരി

ഭൗതികവും ആത്മീയവുമായി ശാന്തി തേടി ജീവിതാവസ്ഥകളെ അവരവർക്ക് അനുകൂലമായി പരിവർത്തിപ്പിക്കാൻ മനുഷ്യൻ കണ്ടെത്തിയ മാർഗ്ഗമാണ് ആരാധന. ഭയവും ദുരിതങ്ങളും ഭാസുരമായ ഭാവിജീവിതവുമാണ് ആരാധനയ്ക്കടിസ്ഥാനം. സാങ്കേതികജ്ഞാനവും യുക്തിവിശ്വാസവും ഉദിക്കുന്നതിന് മുമ്പ് തങ്ങളെ ഭയവിഹ്വലരാക്കുന്ന എല്ലാത്തിനേയും ആരാധിച്ച് അനുനയിപ്പിക്കുക എന്ന ആഗ്രഹം ആരാധനയുടെ പിന്നിലുണ്ട്. സർപ്പാരാധനയുടെ പിന്നിലും ഇത് കാണാം.

നാഗപ്രീതിക്കായി ഒട്ടേറെ അനുഷ്ഠാനങ്ങൾ ആവിഷ്ക്കരിക്കുകയും താന്ത്രിക വിധി പ്രകാരം അവ അനുഷ്ഠിക്കുകയും ചെയ്യുന്നവർ കേരളത്തിലെപ്പോലെ മറ്റെങ്ങുമില്ല. ഒരു കാലത്ത് സമൂഹത്തിന്റെ തന്നെ ഭാഗമായിരുന്ന സർപ്പക്കാവുകൾ മിക്ക തറവാടുകളുടേയും ഐശ്വര്യമായിരുന്നു. സർപ്പങ്ങൾ എന്നു കേൾക്കുമ്പോൾ നമ്മുടെയുള്ളിൽ ഭയം നിറയുമെങ്കിലും സർപ്പക്കാവുകൾ എന്നുകേൾക്കുമ്പോൾ മനസ്സിൽ ഭക്തിയും ഐശ്വര്യവും നിറഞ്ഞാടുന്നു.

സർപ്പക്കാവുള്ള തറവാടുകളിൽ വർഷത്തിലൊരു ദിവസം നൂറും പാലും വഴിപാട് നടത്താറുണ്ട്. ഇതുമൂലം തറവാട്ടിലെ എല്ലാ അംഗങ്ങൾക്കും സന്തതിപരമ്പരകൾക്കും ഐശ്വര്യവും സമൃദ്ധിയും ഉണ്ടാകുമെന്ന് വിശ്വാസം. ഇനി ഈ പാലു നിവേദ്യം ഉണ്ടാക്കാൻ ഉപയോഗിക്കുമ്പോൾ ഈ നൂറിന്റെ പ്രാധാന്യം എന്താണെന്നും അതിന്റെ പിന്നിലെ കഥ എന്താണെന്നും നോക്കാം.

അർജ്ജുനപുത്രനായ അഭിമന്യുവിന് ഉത്തരയിൽ ജനിച്ച മകനാണ് പരീക്ഷിത്ത്. ഉജ്ജ്വലനായ ഒരു രാജാവായിരുന്നു അദ്ദേഹം. ഒരിക്കൽ വനത്തിൽ വേട്ടയാടി ക്ഷീണിച്ച രാജാവ് ശമീകൻ എന്ന മുനിയുടെ ആശ്രമത്തിനടുത്തെത്തി. ധ്യാനനിമഗ്നനായിരുന്ന മുനി പരീക്ഷിത്ത് രാജാവ് അടുത്തുവന്നതോ എന്തൊക്കെയോ ചോദിച്ചതോ അറിഞ്ഞില്ല. മുനി തന്നെ ധിക്കരിച്ചതാണെന്ന് തെറ്റിദ്ധരിച്ച രാജാവ് അടുത്ത് ചത്തുകിടന്ന ഒരു പാമ്പിനെടുത്ത് മുനിയുടെ കഴുത്തിലിട്ട് കൊടുത്തിട്ടു നടന്നുപോയി. അൽപ്പം കഴിഞ്ഞപ്പോൾ മുനിയുടെ പുത്രനായ ഗവിജാതൻ അവിടെയെത്തി. പിതാവിന്റെ കഴുത്തിൽ പാമ്പിൻ ശവമെടുത്തിട്ട് അവഹേളിച്ചവനോട് ഗവിജാതന് കടുത്ത കോപമുണ്ടായി. അയാൾ രാജാവിനെ ശപിച്ചു.

"ഈ നീചകൃത്യം ചെയ്തവൻ ഇന്ന് മുതൽ ഏഴുദിവസത്തിനകം തക്ഷകന്റെ കടിയേറ്റ് മരിക്കാനിടയാവട്ടെ.

ശാപം പുറപ്പെടുവിച്ച് കഴിഞ്ഞശേഷമാണ് ഉത്തമനായ പരീക്ഷിത്ത് രാജാവാണ് ആ കൃത്യം ചെയ്തതെന്നറിഞ്ഞത്. അദ്ദേഹത്തെ ശപിച്ചതിൽ ദുഃഖിതനായ ഗവിജാതൻ ഒരു മുനികുമാരനെ അയച്ച് രാജാവിനെ ശാപവിവരമറിയിച്ചു.