ഈ പുഞ്ചിരികളും ലോകം കാണട്ടെ!

കേരളത്തിലെ മികച്ച ന്യൂ ബോൺ ന്യു ബേബി ഫോട്ടോഗ്രഫറിലേക്കുള്ള അനീഷ് ഹരീന്ദ്രന്റെ ആദ്യ ചുവടായിരുന്നു ആ യാത്ര.

വീട്ടിലെ കടുത്ത എതിർപ്പ്, ഒന്നു സപ്പോർട്ടു ചെയ്യാൻ പോലും ആരുമില്ല. മനസിൽ വേറിട്ട ഫോട്ടോഗ്രഫി മാത്രം. ഒരിക്കലും ഫോട്ടോഗ്രഫിക്ക് വിടില്ലെന്ന് വീട്ടുകാർ. എതിർപ്പ് മലവെള്ളം പോലെ വന്നെങ്കിലും കൗമാര ക്കാരൻ മനസിൽ നിന്നു സ്വപ്നങ്ങളെയും പാഷനെയും വലിച്ചെറിഞ്ഞില്ല.മോഹങ്ങൾ പൂവിട്ടു. ഒരിക്കൽ വീട്ടുകാർ പോലും അറിയാതെ രാജന ഗരിയിൽ നിന്ന് ഫാഷൻ ഫോട്ടോഗ്രഫിയുടെ ഈറ്റില്ലമായ കൊച്ചിയിലേക്ക് കൗമാരക്കാരൻ വണ്ടി കയറി. ജീവിതത്തിലെ തനിച്ചുള്ള ആദ്യ ദീർഘദൂരയാത്ര. ആ യാത്ര വെറുതെയായിരുന്നില്ല. കേരളത്തിലെ മികച്ച ന്യൂ ബോൺ ന്യു ബേബി ഫോട്ടോഗ്രഫറിലേക്കുള്ള അനീഷ് ഹരീന്ദ്രന്റെ ആദ്യ ചുവടായിരുന്നു ആ യാത്ര. വർഷങ്ങൾക്കിപ്പുറം നിഷ്കളങ്കമായി പുഞ്ചിരി തൂകുന്ന കുഞ്ഞുങ്ങളുടെ അപൂർവ നിമിഷങ്ങൾ മികച്ച ഫ്രെയിമുകളാക്കുന്ന പ്രശസ്ത ന്യൂ ബോൺ ബേബി ഫോട്ടോഗ്രഫറാണ് അനീഷ് ഹരീന്ദ്രൻ. ജീവിതം പാഷനാണെന്ന് കാണിച്ചു തന്ന പ്രഫഷണൽ. മിഴിവേകുന്ന ഫ്രെയിമുകൾക്കായി 'വെഡ്ഡിംഗ് സ്റ്റോറീസ് ബൈ എഎച്ച്, 'പീക്ക് എ ബൂ ' എന്ന സംരംഭങ്ങൾക്കും തുടക്കമിട്ടു.

വീട്ടിലെ എതിർപ്പും; ഫോട്ടോഗ്രഫറായി തിരിച്ചു വരവും

 അനീഷിന് ഫോട്ടോഗ്രഫി കുട്ടിക്കളിയായിരുന്നില്ല. സ്കൂളിൽ പഠിച്ചുകൊണ്ടിരുന്ന കാലത്തു തന്നെ സുന്ദരമായ പ്രകൃതി ദൃശ്യങ്ങളോട് പ്രിയം തോന്നിയിരുന്നു. ഫോട്ടോഗ്രഫിയെന്ന ആഗ്രഹവുമായി മാതാപിതാക്കളെ സമീപിച്ചെങ്കിലും അവർ പിന്തുണച്ചില്ല. ഫോട്ടോഗ്രഫി എന്ന കലയെ പാഷനിലുപരി ഒരു പ്രൊഫഷനായി സമൂഹം അംഗീകരിച്ചിട്ടില്ലെന്ന് മാതാപിതാക്കൾ കുറ്റപ്പെടുത്തി. പത്താം ക്ലാസ് പൂർത്തിയാക്കിയ ശേഷം ഫോട്ടോഗ്രഫി പഠിക്കാൻ ആഗ്രഹിച്ചെങ്കിലും വീട്ടിലെ എതിർപ്പ് മൂലം നടന്നില്ല. ഹയർ സെക്കൻഡറി പഠനത്തിന് ശേഷം ബിരുദ പഠനം എന്ന നിർദേശം വീട്ടുകാർ മുന്നോട്ട് വെച്ചു. എന്നാൽ, അനീഷിന്റെ തീരുമാനം ഉറച്ചതായിരുന്നു. വീട്ടുകാരുടെ അനുമതിയില്ലാതെ ഫോട്ടോഗ്രഫി പഠനത്തിനായി കൊച്ചിയിലേക്ക് പോയി.