கத்தாழ காட்டு வழி...காஸ்மெடிக்ஸ் போகும் வழி..!

ஒரு காலத்தில் தரிசு நிலத்தில் முளைத்துக்கிடக்கும் தேவையற்ற களையாக கருதப்பட்டது, கற்றாழை

- த.சக்திவேல்

இடத்தை அடைத்துக் கிடக்கிறது என்று கற்றாழையை வேரோடு பிடுங்கி குப்பையில் எறிந்தனர். 

ஆனால், இன்று கற்றாழையை மக்கள் அணுகும் விதமே வேறு.

ஆம்; ஏராளமான மருத்துவக் குணங்கள் இருக்கும் ஒரு மூலிகையாக கற்றாழையைப் பார்க்கின்றனர். அதனால்தான் ஒவ்வொரு பூங்காவின் முன்பும் கற்றாழை ஜூஸ் கடைகள் வரிசை கட்டுகின்றன. மட்டுமல்ல, அழகு சாதனப்பொருட்கள் தயாரிப்பில் முக்கியப்பங்கு வகிப்பதால் காஸ்மெட்டிக்ஸ் நிறுவனங்களுக்கு மத்தியிலும் கற்றாழைக்கு செம மவுசு.

இப்படியான கற்றாழையை உற்பத்தி செய்வதில் முன்னணியில் இருக்கிறார் ஹரிஷ் தன்தேவ்.

பொதுவாக விவசாயக் குடும்பத்தில் பிறந்த பெரும்பாலானவர்களுக்கு அரசு வேலைதான் கனவு. ஆனால், கைநிறைய சம்பளம் தந்த அரசாங்க வேலையை உதறிவிட்டு, விவசாயியாக மாறியவர் ஹரிஷ் என்பது குறிப்பிடத்தக்கது.

இராஜஸ்தானில் உள்ள ஜெய்சல்மேரில் வசித்து வந்த ஒரு விவசாயக் குடும்பத்தில் பிறந்தவர் ஹரிஷ். இவரது குடும்பத்துக்குச் சொந்தமாக 80 ஏக்கர் நிலம் இருந்தது. அதில் ஒரு பகுதியில் ஹரிஷின் தந்தை ரூபா ராம் தன்தேவ் விவசாயத்தில் ஈடுபட்டு வந்தார். பாலைவனத்தில் விளையும் பயிர்களைப் பயிரிட்டிருந்தார் ஹரிஷின் தந்தை.

ஜெய்சல்மேரில் உள்ள ஆர்யா கல்லூரியில் சிவில் எஞ்சினியரிங் முடித்த ஹரிஷுக்கு, 2013ம் வருடம் ஜெய்சல்மேர் மாநகராட்சியில் ஜூனியர் எஞ்சினியர் வேலை கிடைத்தது. கை நிறைய சம்பளம் தரும் அரசாங்க வேலை அது. வேலைக்கு இடையில் தந்தைக்கு உதவியாக விவசாயம் செய்தார் ஹரிஷ்.

 

ஆனால், முழுநேரமும் விவசாயத்தில் ஈடுபட வேண்டும் என்ற எண்ணம் அவருக்கு இல்லை. நிறைய விவசாயிகள் கடுமையாக உழைத்தும், அதற்கான பலன் கிடைக்காமல் இருப்பதை கவனித்ததால் விவசாயத்தின் மீது ஹரிஷுக்கு பெரிதாக நம்பிக்கை வரவில்லை.

 

‘‘எனக்கு குழந்தைப் பருவத்தில் கேட்ட மூன்று மரவெட்டுபவர்களைப் பற்றிய கதைதான் நினைவுக்கு வருகிறது. மூன்று மரவெட்டிகளிடம் கோடாரி கொடுக்கப்பட்டு, மூன்று மணி நேரத்தில் யார் மரத்தை வெட்டுகின்றனர் என்ற சவால் வைக்கப்பட்டது.