Director ജോഷി

പ്രേക്ഷകരുടെ മനസ്സ് മനസ്സിലാക്കി സിനിമയുടെ മാറ്റങ്ങൾക്കൊപ്പം സഞ്ചരിക്കാൻ കഴിഞ്ഞുവെന്നതാണ് ജോഷിയുടെ വിജയം. 70 പിന്നിടുന്ന സംവിധായകനിൽനിന്ന് സിനിമ ഇനിയുമേറെ പ്രതീക്ഷിക്കുന്നു

- എബി ടി.എബ്രഹാം

 1981 ഓഗസ്റ്റ് 1. ശനിയാഴ്ച. തിരുവനന്തപുരത്തെ എം.പി തിയേറ്ററിനു മുന്നിൽ വൻതിരക്ക്. കാഹളം എന്ന സിനിമയുടെ മാറ്റിനി ഷോ കാണാനെത്തിയ നൂറുകണക്കിന് ആളുകളിൽ സ്ത്രീകളെ മാത്രമേ കടത്തി വിടുന്നുള്ളൂ. കാത്തുനിൽക്കുന്നവരിൽ പ്രേംനസീറിന്റെ ആരാധകരുണ്ടെങ്കിലും അവരുടെ എണ്ണം കുറവാണ്. സീമയാണ് പ്രധാന ആകർഷണം. തമിഴ്നാട്ടിൽ തകർത്ത് ഓടിയ ഒരു തലൈ രാഗം' എന്ന സിനിമയുടെ നായകനായ രവീന്ദ്രനിലായിരുന്നു യുവാക്കളുടെ പ്രതീക്ഷ. ആകെ ബഹളമയം. "കാഹളം' കണ്ടേ തീരൂ. രണ്ടുണ്ട് കാരണങ്ങൾ. ഒന്ന്, ജയൻ മരിച്ച അതേ ആഴ്ചതന്നെ റിലീസായ 'മൂർഖൻ സംവിധാനം ചെയ്ത ജോഷിയുടെ മൂന്നാമത്തെ സിനിമയാണിത്. "മൂർഖനി'ലെ സംഘട്ടനരംഗങ്ങളും ജയന്റെ വീരസ്യവും വല്ലാത്തൊരു തരിപ്പോടെ കോട്ടയം അനുപമ തിയേറ്ററിൽ ഇരുന്നുകണ്ടു. ഒരു പതിമൂന്നുകാരനിൽ ജോഷിയോട് ഉണ്ടാക്കിയ ആരാധന ചെറുതായിരുന്നില്ല. രണ്ട്, സൂപ്പർ താരവും ആരാധനാപാത്രവുമായിരുന്ന ജയന്റെ സിംഹാസനത്തിൽ ഇരിക്കാൻ രവീന്ദ്രൻ യോഗ്യനാണോ എന്നറിയണം. കൂടെയുണ്ടായിരുന്ന ചേട്ടന്മാരുടെ മിടുക്കിൽ ബ്ലോക്കിൽ ടിക്കറ്റുകൾ സംഘടിപ്പിച്ച് തിങ്ങി നിറഞ്ഞ തിയേറ്ററിലേക്ക് ആവേശത്തോടെ ഇരുപ്പുറപ്പിച്ചു. ജയന്റെ നിലവാരത്തിലേക്ക് രവീന്ദ്രന് ഉയരാനാവില്ലെന്ന് "കാഹള'ത്തിന്റെ ഇന്റർവെല്ലിനു തന്നെ ഉറപ്പിച്ചു. ജയന്റെ പൗരുഷമില്ല. സംഘട്ടന രംഗങ്ങളിൽ സ്വാഭാവികതയും തീവ്രതയുമില്ല രവീന്ദ്രന്. ജോഷിയും പ്രതീക്ഷിച്ച നിലവാരത്തിലേക്ക് ഉയർന്നില്ല. കാഹളം മൊത്തത്തിൽ നിരാശപ്പെടുത്തി.