കലർപ്പില്ലാത്ത സംഗീതം ജീവിതം

“രവിയുടെ ഗാനങ്ങളിൽ ഏറെ സ്വാതന്ത്ര്യത്തോടെ ഞാൻ പാടി. പറഞ്ഞറിയിക്കാൻ കഴിയാത്തൊരു സ്നേഹബന്ധം ഞങ്ങൾക്കിടയിൽ നിലനിന്നു, യേശുദാസിന്റെ വാക്കുകളിലേക്ക് 

- തയ്യാറാക്കിയത്: കെ.കെ.വിനോദ് കുമാർ

സംഗീത കോളേജിൽ എന്റെ ജൂനിയറായിരുന്നു രവി. എങ്കിലും ഞങ്ങൾക്ക് അക്കാലത്ത് അത്രയൊന്നും അടുപ്പമുണ്ടായിരുന്നില്ല. മദ്രാസിൽ വെച്ചാണ് ഞങ്ങൾ കൂടുതൽ അടുത്തത്. ആ ബന്ധം ഏറെ വളർന്നു. അവനെനിക്ക് പിറക്കാതെ പോയ അനിയൻ തന്നെയായിരുന്നു. മദ്രാസിൽ ഉള്ള സമയത്ത് മിക്കവാറും എല്ലാ ദിവസവും അണ്ണാമലൈപുരത്തുള്ള എന്റെ വീട്ടിലേക്കുവരും. സിനിമാ ഗായകനാവാൻ വേണ്ടിയായിരുന്നു അവൻ മദ്രാസിൽ വന്നതുതന്നെ. ചില പാട്ടുകളൊക്കെ സിനിമയിൽ പാടുകയും ചെയ്തു. എന്നാൽ അതൊന്നും നിത്യജീവിതം മുന്നോട്ടു കൊണ്ടു പോകാൻ മതിയായിരുന്നില്ല. പിന്നീട് ഡബ്ബിങ് ആർട്ടിസ്റ്റായി ജോലി നോക്കി. നല്ല ശബ്ദത്തിനുടമയായിരുന്ന അവൻ നടൻ രവികുമാറിന്റെ ഡബ്ബിങ് ആർട്ടിസ്റ്റായി കുറച്ചുകാലം ജോലി ചെയ്തു. പിന്നീട് രവികുമാറിന് സിനിമകൾ കുറഞ്ഞുതുടങ്ങിയതോടെ ജീവിതം വീണ്ടും കഷ്ടപ്പാടിലായി. ജീവിക്കാൻ പല മേഖലകളും തിരഞ്ഞുതുടങ്ങി. നല്ല സംഗീതജ്ഞാനമുള്ള കലാകാരനായിരുന്നു രവി. പല അവസരങ്ങളിലും അതെനിക്ക് നേരിട്ട് ബോധ്യമായിട്ടുണ്ടായിരുന്നു. "നിനക്കു കമ്പോസ് ചെയ്തൂടെ' എന്ന് ഞാനൊരിക്കൽ അവനോടു ചോദിച്ചു. "എനിക്കാര് പടം തരും ദാസേട്ടാ. അപ്പോഴത്തെ രീതി അനുസരിച്ച് അതു ശരിയായിരുന്നു. അവന്റെ നിരാശ കലർന്ന ചോദ്യം എന്നെ ഒരുപാട് വേദനിപ്പിച്ചു.