സക്കുലന്റ്സ് മനം മയക്കും കൊച്ചു സുന്ദരികൾ...

പൂന്തോട്ടത്തിലെയും ലിവിങ് റൂമിലെയും പുതിയ അതിഥികളായ സക്കുലന്റ് ചെടികൾ, അവയുടെ പരിപാലനം എന്നിവ പരിചയപ്പെടുത്തുകയാണ്, സക്കുലന്റ് ഗാലറി ഡോട്ട് കോം സ്ഥാപകനായ സിയാദ് എറിയാടാൻ 

- സിയാദ് എറിയാടാൻ സക്കുലന്റ് ഗാലറി ഡോട്ട് കോം

പ്രകൃതിയുടെ മുഴുവൻ സൗന്ദര്യവും മൃദുലതയുമൊക്കെ ഒരു കുഞ്ഞൻ ചെടിയിലേക്ക് ആവാഹിച്ചതു പോലെയാണ് സക്കുലൻറുകൾ, സ്വീകരണ മുറികളെയും പൂന്തോട്ടങ്ങളെയും ഒരുപോലെ അലങ്കരിക്കുന്ന സക്കുലൻറുകൾ ഇന്ന് ട്രെൻഡിങ്ങാണ്. കണ്ണഞ്ചിപ്പിക്കുന്ന നിറങ്ങളിലും മോഹിപ്പിക്കുന്ന ആകൃതികളിലും ലഭ്യമായ ഈ കുഞ്ഞൻ ചെടികൾ, ഇന്ന് ഒട്ടുമിക്ക മലയാളികളുടെയും അകത്തളങ്ങളിൽ ഇടംപിടിച്ചുകഴിഞ്ഞു. വിചിത്രമായ ആകൃതിയിലും നിറങ്ങളിലും ലഭ്യമായ കുഞ്ഞൻ ചെടികളുടെ ശേഖരണം പ്രായഭേദമന്യേ ആളുകൾക്കിടയിൽ ഹോബിയായി മാറുകയാണ്.

മറ്റു ചെടികളെ അപേക്ഷിച്ചു പരിപാലനം കുറവായതിനാലും എവിടെയും കൊണ്ടുനടക്കാമെന്നതിനാലും സ്ഥലപരിമിതികൾക്കിടയിലും തിരക്കുപിടിച്ച ജീവിതത്തിനിടയിലും വീടുകളിൽ മാത്രമല്ല, ജോലിസ്ഥലങ്ങളിലും ഇത്തരം ചെടികൾ ഇന്ന് ഇടംപിടിച്ചുകഴിഞ്ഞു. പക്ഷേ, പലർക്കും ശരിയായ പരിചരണം അറിയാത്തതിനാൽ മോഹിപ്പിക്കുന്ന ഭംഗിയും നിറവും കണ്ട് വാങ്ങിയ ചെടികൾ അതിവേഗം നശിക്കുന്ന പ്രവണതയാണ് കണ്ടുവരുന്നത്.

എന്താണ് സക്കുലന്റ് ചെടികൾ?

സക്കുലന്റ് ചെടികളുടെ ജന്മദേശം പൊതുവെ വരണ്ട ഭൂപ്രദേശങ്ങളുള്ള രാജ്യങ്ങളാണ്. ലഭ്യമായ ഭൂരിഭാഗം സക്കുലന്റ് ചെടികളുടെയും തറവാടെന്നു വിശേഷിപ്പിക്കുന്നത് വടക്ക്, തെക്ക് അമേരിക്ക, ആഫ്രിക്ക തുടങ്ങിയ രാജ്യങ്ങളാണ്. ഉയർന്ന താപനിലയും വരണ്ട മണ്ണും വളരെ കുറഞ്ഞ മഴയും ലഭിക്കുന്ന, മറ്റു ചെടികൾക്ക് നിലനിൽക്കാൻ കഴിയാത്ത ആവാസവ്യവസ്ഥയിൽ പോലും സക്കുലന്റ് ചെടികൾ അതിജീവിക്കും. മരുഭൂമികളിലും വരണ്ട പ്രദേശങ്ങളിലും കാണപ്പെടുന്ന ഇവക്ക് വരൾച്ചയെ നേരിടാൻ ആവശ്യമുള്ള ജലം ഇലകളിലും തണ്ടുകളിലുമായി ശേഖരിച്ചുവെച്ച് വേണ്ടസമയത്ത് ഉപയോഗിക്കാനുള്ള കഴിവുണ്ട്. അതുകൊണ്ടുതന്നെ നമ്മുടെ ഭൂപ്രകൃതിക്കും കാലാവസ്ഥക്കും അനുസരിച്ച് ഇതിനെ മെരുക്കി വളർത്തുകയാണ് വേണ്ടത്.

പരിപാലനം