പരിധിയില്ലാ ആത്മവിശ്വാസം

യുവസംരംഭക പ്രിയ പറയുന്നു. പരിധിയും പരിമിതിയും നിശ്ചയിക്കുന്നത് നമ്മൾ തന്നെ

- ബിജീഷ് ബാലകൃഷ്ണൻ

ഒരു സംരംഭം തുടങ്ങാൻ ഏറ്റവും ആദ്യം വേണ്ടതെന്താണ്? പണം എന്നാണ് ഉത്തരമെങ്കിൽ, ആത്മവിശ്വാസമാണ് പ്രധാനമെന്ന് പറയും പത്തനംതിട്ട അടൂരിൽനിന്നുള്ള 26കാരി പ്രിയ മാത്യു. പരിമിതികൾ മനസ്സിൽ മാത്രമാണെന്നും അതിൽ നിന്ന് മോചനം നേടിയാൽ ജീവിത വിജയം എത്തിപ്പിടിക്കാമെന്നും കാണിച്ചുതരുകയാണ് 'ഗ്ലാഡ് ബേക്സ്' എന്ന ബേക്കറി യൂനിറ്റ് ഉടമ കൂടിയായ ഈ ഭിന്നശേഷിക്കാരി. ബിരുദാനന്തര ബിരുദ പഠനത്തിന്റെ അവസാന സെമസ്റ്ററിൽ മുണ്ടപ്പള്ളിയിൽ പ്രിയ തുടക്കമിട്ട ബേക്കറി യൂനിറ്റ് ഇന്ന് വിജയകരമായി മുന്നോട്ടുപോകു കയാണ്.

പഫ്സ്, ബ്രഡ്, റസ്ക്, കുക്കീസ്, പിറന്നാൾ കേക്ക്, പ്രമേഹ രോഗികൾക്കുള്ള ബേക്കറി ഉൽപന്നങ്ങൾ തുടങ്ങി രുചിയൂറും പലഹാരങ്ങൾ ഏറെയുണ്ട് ഗ്ലാഡ് ബേക്സിൽ. പഠനത്തിനൊപ്പം ഒരു വരുമാനമാർഗം കൂടി കണ്ടെത്തി വീട്ടുകാരെ സഹായിക്കണമെന്നായിരുന്നു പ്രിയക്ക്. അങ്ങനെയാണ് ബേക്കറി പലഹാരങ്ങളുണ്ടാക്കിയാലോ എന്ന ആലോചന വരുന്നത്. പിന്നീടത് ബേക്ഡ് പലഹാരങ്ങളുണ്ടാക്കുന്ന യൂനിറ്റിലേക്കെത്തി. നേരിട്ടെത്തുന്നവർക്കും ഓർഡർ നൽകിയാൽ ഹോട്ടലുകളിലേക്കും പലഹാരം നൽകും.

“ആളുകൾക്ക് ഏറ്റവും അത്യാവശ്യമുള്ളത് ഭക്ഷണമാണ്. നല്ല ഭക്ഷണം നൽകിയാൽ ആളുകൾ നമ്മെ തേടിയെത്തും. പലഹാരങ്ങൾ കഴിക്കാനിഷ്ടമില്ലാത്തവർ വിരളമാണ്. ആ ചിന്ത മനസ്സിൽ വന്നതോടെയാണ് ബേക്കറി ആരംഭിക്കാമെന്ന തീരുമാനത്തിലെത്തിയത്" -പ്രിയ പറയുന്നു. എന്നാൽ, ആ സ്വപ്നം യാഥാർഥ്യമാക്കൽ അത്ര എളുപ്പമായിരുന്നില്ല. സാമ്പത്തികസ്രോതസ്സ് കണ്ടെത്തലായിരുന്നു വലിയ പരീക്ഷണഘട്ടം.