fizzy SoDa

കിളി പോയി, ആത്മാവേ പോ, ഉള്ളം കലക്കി... ഈ പേരുകൾ കേട്ടാൽ തന്നെ ആർക്കും അറിയാം സംഗതി നമ്മുടെ സോഡ സർബത്ത് ന്യൂജൻ ആയതാണെന്ന്. പലവിധ ഫ്ലേവറുകൾ സോഡയിൽ ചേർത്ത് കിടിലോൽക്കിടിലം പേരുമിട്ട് വിളമ്പും. എത്ര പരിഷ്കരിച്ചാലും ഉള്ളിലുള്ളത് സോഡ തന്നെ. അറിയാം സോഡ ചരിത്രം...

നാടാകെ സോഡയുടെ പിടിയിലാണ്. എവിടേക്ക് ഇറങ്ങിയാലും ഒരു നാരങ്ങ സോഡ കുടിച്ചാണ് കാര്യങ്ങൾ തുടങ്ങിയിരുന്നത് എങ്കിൽ ഇന്ന് അതിനെ സൈഡാക്കി. പകരം നാവിൽ തുള്ളിക്കളിക്കുന്ന പലവിധ പേരുകൾ ചുമത്തി വിവിധ ഫ്ലേവറുകളിൽ ഡോഡ പെരുകി. ട്രെൻഡായി മാറിയ കുലുക്കി സർബത്തുകളിൽ തുടങ്ങി ഓരോ നാട്ടിലും വ്യത്യസ്ത ചേരുവകൾ ചേർത്ത് എല്ലാ പ്രായക്കാരെയും ആകർഷിക്കുകയാണ് സോഡ.

ഇത്രയധികം ചേരുവകൾ ചേർത്ത് എരിവും പുളിയും മധുരവും മിക്സ് ചെയ്തിറക്കുന്ന സോഡകൾ തീർക്കുന്ന ആരോഗ്യപ്രശ്നങ്ങൾ ആശങ്ക പരത്തുന്നുണ്ട്. അമിതമായ ഉപയോഗം ഏത് ആഹാരമായാലും ആപത്താണെന്നത് സോഡക്കും ബാധകം തന്നെ. സോഡയുടെ ചരിത്രവും വികാസവും വായിക്കാം.

എന്താണ് സോഡ?

കാർബണേറ്റഡ് വാട്ടർ എന്നാണ് സോഡയുടെ നല്ല പേര്. ചുരുക്കത്തിൽ കാർബൺഡൈ ഓക്സൈഡ് മർദത്തിൽ കലർത്തപ്പെട്ട വെള്ളം. ഇതിൽനിന്ന് കുമിളകൾ ഉയരും.

സോഡാവെള്ളത്തിന്റെ ചരിത്രം 18-ാം നൂറ്റാണ്ടിന്റെ അവസാനത്തിലാണ് ആരംഭിക്കുന്നത്. ജോസഫ് പ്രീസ്റ്റ്ലി എന്ന ബ്രിട്ടീഷ് രസതന്ത്രജ്ഞൻ കാർബൺഡൈ ഓക്സൈഡ് വെള്ളത്തിൽ സന്നിവേശിപ്പിക്കുന്ന രീതി ആദ്യമായി കണ്ടത്തി. അതിനെ അദ്ദേഹം 'സോഡാവാട്ടർ' എന്ന് വിളിച്ചു. ഈ വെള്ളം പെട്ടെന്ന് ജനപ്രീതി നേടുകയും താമസിയാതെ ആധുനിക ശീതളപാനീയ വ്യവസായത്തിന്റെ വികാസത്തിന് തുടക്കമിടുകയും ചെയ്തു.

ഇന്ന്, എല്ലാ രാജ്യങ്ങളിലും സോഡാവെള്ളം വ്യാപകമായി ലഭ്യമാണ്. വെറും വെള്ളത്തെക്കാൾ ഉന്മേഷദായകമായി കാർബണേറ്റഡ് വെള്ളത്തെ ആളുകൾ തിരഞ്ഞെടുക്കുന്നു. കോക്ക്ടെയിലുകളിലും മറ്റു പാനീയങ്ങളിലും ഇത് സാധാരണയായി ഒരു മിക്സറായും ഉപയോഗിക്കുന്നു.