ഡോക്ടർമാരുടെ ഉമ്മ

കോഴിക്കോട് നാദാപുരം കസ്തൂരിക്കുനിയിൽ വീടിന് പറയാനുള്ളത് വ്യത്യസ്തമായൊരു കഥയാണ്. ആറു പെൺമക്കളെയും പഠിപ്പിച്ച് ഡോക്ടർമാരാക്കി നാടിന് സമ്മാനിച്ച ഒരു ഉമ്മയുടെ കഥ...

- അനൂപ് അനന്തൻ 

 'നിങ്ങൾ ഒരു കാര്യം അതി തീവ്രമായി ആഗ്രഹി ച്ചാൽ അത് നിങ്ങൾക്ക് നേടിത്തരാൻ വേണ്ടി ഈ പ്രപഞ്ചം മുഴുവൻ ഗൂഢാലോചന നടത്തും പൗലോ കൊയ്ലോയുടെ വിഖ്യാതമായ 'ആൽക്കെമിസ്റ്റ്' നോവലിലെ ഈ വാചകം പോലെ സ്വപ്നങ്ങൾക്കു പിന്നാലെ നിശ്ചയദാർഢ്യത്തോടെ ചുവടുവെച്ച നിരവധി പേരുടെ ജീവിതകഥകൾ നാം കേട്ടിട്ടുണ്ട്. കോഴിക്കോട് നാദാപുരം കസ്തൂരിക്കുനിയിൽ വീടിന് പറയാനുള്ളത് ഏറെ വ്യത്യസ്തമായൊരു കഥയാണ്. ഓരോ രക്ഷിതാക്കളും അറിഞ്ഞിരിക്കേണ്ട ജീവിതകഥ. ഓരോ മക്കളും തിരിച്ചറിയേണ്ട വഴികൾ. സൈന ഉമ്മയുടെ ജീവിതം ശരിക്കും ഒരു പാഠപൂസ്തകമാണ്. താളുകളിൽ ഓരോന്നിലും ജീവിത സ്വപ്നങ്ങളെ പൂവണിയിച്ചതിന്റെ ഏടുകളാണ്. ഈ ജീവിതം ഇരുത്തി ചിന്തിപ്പിക്കും. നിശ്ചയദാർഢ്യത്തോടെ മുന്നോട്ട് പോകാനുള്ള തീരുമാനം നിങ്ങളിലുണ്ടാകും. കേട്ടുപഴകിയ പൗലോ കൊയിലോയുടെ വാക്കുകൾ അക്ഷരാർഥത്തിൽ ഇവിടെ പൂവണിഞ്ഞതായി കാണാം.

ഭർത്താവ് ടി.വി.പി. അഹമ്മദ് കുഞ്ഞമ്മദ് കുട്ടിയുടെ നടക്കാതെ പോയെ ഡോക്ടറാവുകയെന്ന ജീവിത സ്വപ്നം മക്കളിലൂടെ യാഥാർഥ്യമാക്കിയിരിക്കുകയാണ് അഞ്ചാം ക്ലാസ് വരെ മാത്രം പഠിച്ച സൈന ഉമ്മ. ഇവരുടെ ആറു പെൺമക്കളും പഠിച്ച് ഡോക്ടർമാരായി.

ഇക്കഴിഞ്ഞ ഏപ്രിൽ 14ന് സൈന ഉമ്മയുടെ മനസ്സിൽ സന്തോഷ നിലാവായിരുന്നു. അഞ്ചാമത്തെ മകൾ റെയ്ഹാനയുടെ വിവാഹമായിരുന്നു. ചുറ്റും കുടുംബക്കാർ. പല നാടുകളിലായുള്ളവരെല്ലാം ഒപ്പമുണ്ട്. സന്തോഷത്തിൽ കൂടെ നിൽക്കാനെത്തിയവരുടെ മുന്നിൽ അഭിമാനത്തോടെ ചിരിച്ച് സൈന ഉമ്മ നിന്നു. ഒപ്പം ആറു പെൺമക്കളും മരുമക്കളും പേരമക്കളും. എല്ലാവരും ഒരേ സ്വരത്തിൽ പറയുന്നു 'ഉമ്മയാണിവിടെ ഹീറോ...

അന്നൊരു കാലത്ത്...