અલ જવાહિરીના અંત બાદ જેહાદીઓનો બેલી કોણ?

અમેરિકાના મૉસ્ટ વૉન્ટેડ ટૅરરિસ્ટોની યાદીમાં જવાહિરીને જગ્યા મળી. બિન લાદેન વગેરે અફઘાનિસ્તાનના નાગરિકો બન્યા. આખરે વર્લ્ડ ટ્રેડ સેન્ટર પર ૯/૧૧ના હુમલાની યોજના ઘડી તેને અંજામ આપ્યો અને જગતને હચમચાવી દીધું

- વિનોદ પંડ્યા

અફઘાનિસ્તાનના મોટા ભાગના લોકો રોજબરોજના જીવનવ્યાપનની ચિંતામાં પડ્યા છે ત્યારે જુલાઈના છેલ્લા દિવસે કાબુલનો શે૨પુરા નામક શ્રીમંતો અને સત્તાધારીઓ માટેનો વિસ્તાર બે અમેરિકી હેલફાયર મિસાઇલોના વિસ્ફોટથી ગાજી ઊઠ્યો. કાબુલના લોકોને હંમેશની માફક ફાળ પડી કે ફરી પાછા પચાસથી સો માણસો માર્યા ગયા હશે. હકીકતમાં માત્ર અલ કાયદાનો પ્રમુખ અલ જવાહિરી જ માર્યો ગયો હતો. પોતાના મકાનની બાલ્કનીમાં પગ છૂટો કરવા અને પુસ્તક વાંચન કરવા આવ્યો ત્યારે મહિનાઓથી એની રોજનીશી લખી રહેલી અમેરિકી સેનાએ ડ્રોન વડે મિસાઇલો છોડીને એને ખતમ કરી નાખ્યો. એ કુટુંબ સાથે એ જ મકાનમાં રહેતો હતો, પણ અમેરિકી સેનાએ એટલી સાવચેતી સાથે મિશન પાર પાડ્યું કે બીજા કોઈ સભ્યને હળવી ઈજા પણ ન પહોંચી.

શક્ય છે કે અમેરિકી મિશનમાં એટલી હદે ચોક્સાઈ રાખવામાં ન આવી હોય કે અન્ય કોઈ મરે જ નહીં, કારણ કે એક મકાન પર બે મિસાઇલો છોડવી એ વાત જ કોલેટરલ ડેમેજ (અન્ય નિરપરાધીઓની જાનહાનિ) થશે એવી ધારણા સાથે જ છોડવામાં આવી હોય. જોકે અબોટાબાદ ખાતે બિન લાદેનને પણ, નિર્દોષોની જાનહાનિ ન થાય એ સાવચેતી સાથે જ ઠાર કરાયો હતો. છતાં વીસ વર્ષના ત્રાસવાદ સામેના અમેરિકી યુદ્ધમાં આકાશમાંથી અચાનક તૂટી પડતી મિસાઇલોએ પાકિસ્તાન અને અફઘાનિસ્તાનમાં અનેક નિર્દોષોના જાન લીધા છે. ગયા વર્ષે કાબુલમાં દસ નાગરિકો માર્યા ગયા હતા.