પ્રમુખસ્વામી શતાબ્દી મહોત્સવની સેવામાં મહિલાઓનું વિશિષ્ટ પ્રદાન

માત્ર અમદાવાદ કે ગુજરાત જ નહીં, પરંતુ સમગ્ર ભારત અને આંતરરાષ્ટ્રીય સ્તરે એક આગવી છાપ ઊભી કરનાર પ્રમુખસ્વામી મહારાજ શતાબ્દી મહોત્સવની શરૂઆત થઈ ગઈ છે, ત્યારે વાત કરવી છે એવી મહિલાઓની જેમણે પોતાનું સમગ્ર કામકાજ છોડી આ સેવાકીય પ્રવૃત્તિમાં ભાગ લીધો.

પ્રમુખસ્વામી મહારાજની શતાબ્દી મહોત્સવની ઉજવણીની તૈયારીઓ શરૂ થઈ ત્યારથી જ ‘અભિયાન’ સમયઅંતરાલ નગરની મુલાકાતે જાય. આટલા વિશાળ આયોજનને જ્યારે શબ્દોમાં કંડારવાની વાત આવે એટલે નિત-નવી વાતો પર ધ્યાન જાય તે સ્વાભાવિક છે અને આવી જ એક મુલાકાત દરમિયાન પ્રમુખસ્વામીનગરના ક્લિનિંગ વિભાગમાં જવાનું થયું. ત્યાં કોઈ મહિલા કચરો વાળતાં નજરે પડ્યાં, તો કોઈ વળી પોતું મારતાં હતાં. મારી નજર પડી એક યુવતી પર, જે શાંતિથી ટૉઇલેટ સાફ કરી રહી હતી. કદાચ પોતાના ઘરમાં પણ આટલી ઝીણવટપૂર્વક સાફ સફાઈ ના થાય તેવી બારીકાઈથી અહીં કામ ચાલી રહ્યું હતું. કુતૂહલવશ જ મેં પૂછી લીધું કે, ટૉઇલેટ-બાથરૂમની સાફસફાઈની સેવા તમે જાતે જ લો છો કે પછી અહીંથી સોંપવામાં આવે છે? તરત જ પેલી યુવતી ઊભી થઈને મારી પાસે આવી. આદરપૂર્વક જય સ્વામિનારાયણ કહીને બોલી, ‘આ સેવા તો જેના અહોભાગ્ય હોય તેને મળે.’ મેં જરા વધારે જ પૂછ્યું કે ‘હા, એ વાત સાચી, પરંતુ સામાન્ય રીતે તો આવી સેવા કરવામાં લોકોને ઝાઝો રસ નથી હોતો.’ ત્યારે એ યુવતીએ કહ્યું, ‘ના, એવું નથી. અહીં સેવા માટે આવેલી દરેક વ્યક્તિ માટે સેવા મહત્ત્વની છે. ક્યાં કરવાની, કેવી સેવા કરવાની એ બધું તો જરાય મનમાં પણ ના હોય.’ આટલી વાત પછી મેં જોયું જ્યારે એ યુવતી મારી સાથે વાત કરી રહી હતી, ત્યારે અન્ય કોઈ પણ મહિલા કે યુવતીઓ અમારી વાતમાં ધ્યાન નહોતાં આપતાં. બસ, દરેક મહિલા ત્યાં મનમૂકીને શાંતિથી પોતાની સેવામાં લીન હતી.