‘આધુનિક મીરાં’ વાણી જયરામની ભક્તિસાધના વિરામ પામી

વાણી જયરામે પોતાની કારકિર્દીમાં તમિળ, તેલુગુ, કન્નડ, મલયાલમ, હિન્દી, ઉર્દૂ, મરાઠી, ભોજપુરી અને ઉડિયા સહિત ૧૯ ભાષાઓમાં ૧૦ હજાર કરતાં વધારે ગીતો ગાયાં છે

- પાર્થ દવે

મોટા ભાગે દક્ષિણ ભારતીય ભાષાઓમાં ગીતો ગાનાર, ત્રણ વખત નેશનલ એવોર્ડ વિજેતા ગાયિકા વાણી જયરામે દુનિયાને અલવિદા કહી. ૩૦ નવેમ્બર, ૧૯૪૫ના રોજ જન્મેલાં વાણી જયરામનું ૪થી ફેબ્રુઆરીએ નિધન થયું. અહેવાલો મુજબ થોડા સમય પહેલાં તેમના માથા પર ઈજા થઈ હતી. તેના કારણે તેઓ બીમાર રહેતાં હતાં. શનિવારની સવારે તેઓ તેમના ઘરે મૃત હાલતમાં મળી આવ્યાં. હજુ સુધી મૃત્યુનું સ્પષ્ટ કારણ નથી મળી શક્યું. વાણી જયરામને હાલમાં જ ગણતંત્ર દિનના એક દિવસ પહેલાં પદ્મભૂષણથી સન્માનિત કરવામાં આવ્યાં હતાં. વાણી જયરામે હાલમાં એક વ્યવસાયી ગાયક તરીકે સંગીત ઉધોગમાં ૫૦ વર્ષ પૂર્ણ કર્યાં હતાં. તેમણે પોતાની કારકિર્દીમાં તમિળ, તેલુગુ, કન્નડ, મલયાલમ, હિન્દી, ઉર્દૂ, મરાઠી, ભોજપુરી અને ઉડિયા સહિત ૧૯ ભાષાઓમાં ૧૦ હજાર કરતાં વધારે ગીતો ગાયાં છે.