એવરેજથી ક્લાસિક સુધીની ‘હેરાફેરી'!

‘હેરાફેરી’ ફિલ્મને આજે જેટલો મીમ થકી પ્રતિભાવ મળી રહ્યો છે તેટલો રિલીઝ થઈ ત્યારે નહોતો મળ્યો! અત્યારે લોકો ખૂબ પસંદ કરી રહ્યા છે એવાં એનાં દૃશ્યોને ત્યારે અવગણવામાં આવ્યાં હતાં. ‘હેરાફેરી'ના બંને ભાગ, તેના થકી બનેલા મીમ અને ટુચકા યુવાપેઢીમાં લોકપ્રિય છે, ત્યારે એક સફર ‘હેરાફેરી’ ફ્રેન્ચાઇઝીની..

- પાર્થ દવે

હવે જૂના થઈ ગયા એવા સમાચાર એ હતા કે ‘હેરા ફેરી’ ભાગ-૩ કચ્છી માડુ નીરજ વોરા બનાવવાના હતા, જે વિદાય લઈ ગયા. તે વખતે ‘ હેરી પે ફેરી’ જેવું કંઈક નામ 'ને અભિષેક બચ્ચન તથા જોન અબ્રાહમ નક્કી થયેલા. બાદમાં થોડા સમય પહેલાં સમાચાર હતા કે ‘હેરા ફેરી’ના ત્રીજા ભાગમાં કાર્તિક આર્યન જોવા મળવાનો છે અને અક્ષય કુમાર આઉટ થયો છે. આ સમાચારની પહેલા અક્ષય કુમારે પુષ્ટિ કરી કે તે હવે આ ફ્રેન્ચાઇઝીનો ભાગ નથી અને બાદમાં પરેશ રાવલે પુષ્ટિ કરી. આ ફિલ્મનું દિગ્દર્શન અનીસ બઝમી કરશે તેવું નક્કી હતું. હવેના તાજા સમાચાર મુજબ ‘હેરા ફેરી ભાગ ૩’નું દિગ્દર્શન ‘ડ્રિમ ગર્લ’ના દિગ્દર્શક રાજ શાંડિલ્ય કરશે.

૨૦૦૦માં આવેલી ‘હેરા ફેરી’ અને તેના ૬ વર્ષ બાદ આવેલી ‘ફિર હેરા ફેરી’ની આજે કોઈ સંપત્તિ હોય તો તેના મીમ્સ! ફિલ્મ હાસ્યસભર મનોરંજક તો હતી જ, આજે પણ ઇન્ટરનેટની દુનિયામાં આ ફિલ્મો અત્યંત લોકપ્રિય છે. લોકો વાતચીતમાં પણ અક્ષય કુમાર - રાજપાલ યાદવ - મનોજ જોષી- પરેશ રાવલ કે જોની લીવરના સંવાદ ફ્ટકારી દે છે. આ બંને ફિલ્મની મોટા ભાગની સિચ્યુએશન્સ લોકોને યાદ રહી ગઈ છે. ‘હેરા ફેરી’નું નિર્દેશન પ્રિયદર્શને કર્યું હતું અને લેખન નીરજ વોરાએ કર્યું હતું, જ્યારે ‘ફિર હેરા ફેરી'નું લેખન અને દિગ્દર્શન, બેઉ નીરજ વોરાએ કર્યું હતું.

૬ વર્ષના અંતરાલમાં ‘હેરા ફેરી’ના બે ભાગ બન્યા. હવે ૧૭ વર્ષ થઈ ચૂક્યા છે. એટલે આટલા સમય બાદ ત્રીજો ભાગ આવે તો તે કેટલો પ્રાસંગિક રહે છે તે પણ એક સવાલ છે. નીરજ વોરાએ લખેલી અને પ્રિયદર્શને ડિરેક્ટ કરેલી ‘હંગામા’ ફિલ્મ જેવું થાય. ‘હંગામા’નો પહેલો ભાગ ૨૦૦૩માં આવેલો અને બીજો ૧૮ વર્ષ બાદ, ૨૦૨૧માં. પ્રિયદર્શને જ દિગ્દર્શિત કરેલી ‘હંગામા ૨’ વાહિયાત કિસમની ફિલ્મ હતી. બનાવવાની જરૂર જ નહોતી આ કક્ષાની ફિલ્મ!