ઉત્સવો આપણને કંઈક કહી ગયા...

કળી કળીના રોમ ચમકતા, અજવાળાં કોઈ ઝીલો જી પાન પાનમાં ગાન છલકતાં, અજવાળાં કોઈ ઝીલો જી - લતા હિરાણી

- વિદુર

પર્વ સપ્તાહમાંથી પરવારીને આપણે રોજિંદા જીવનની દિનચર્યામાં વ્યસ્ત થઈ ગયા છીએ, પરંતુ પર્વોનો ખુમાર તો હજુ થોડા દિવસ મન-મસ્તક પર રહેશે. ધાર્મિક અને સામાજિક ઉત્સવો આપણી આસપાસ એક અનોખો માહોલ રચી દે છે. આપણી સંસ્કૃતિનું ઔદાર્ય તેમાં પ્રગટ થાય છે. પ્રત્યક્ષ મિલનમુલાકાતમાં અને શુભેચ્છા સંદેશની આપ-લેમાં આપણે સૌ અન્યનાં સુખ-વૈભવની કામના કરીએ છીએ. એ સમયે આપણી ખુદની પ્રસન્નતા કેટલી બધી વધી જાય છે... સૌનો પોતાનો એ આગવો અનુભવ છે. અન્યના શુભ-લાભની કામના કરીએ ત્યારે આપણી પોતાની પોઝિટિવ ઊર્જા સક્રિય બને છે. આપણા સ્નેહી-મિત્રો પણ આપણે માટે એવી જ શુભેચ્છાની લાગણી પ્રદર્શિત કરે છે ત્યારે આવી પોઝિટિવ ઊર્જાનું એક વર્તુળ રચાય છે.