હિટ નચાવે એમ હેલ્થ નાચે

પાકો ઉનાળો શરૂ થઈ જાય એ કાળમાં શારીરિક શ્રમ કે કસરત કમ કરવા જોઈએ. કેમ કે શરીરમાં ઑલરેડી અગ્નિ બરાબર જીવંત થઈ ગયો હોય, બૉડીમાં હિટ પેદા થઈ ગઈ હોય 'ને રહેતી હોય. એ સમયમાં શરીરમાં બહારથી ગરમી અંદર લેવી જોખમ ઓર શરીરમાં અંદર ગરમી પેદા થાય એવું ખાવું જોખમ

- ગૌરાંગ અમીન

હું કૂલ છું કે હું હૉટ છું એવું માનતા સૌ સ્વ ખાસ જાણી લે

અગ્નિ સાથે કરેલી આપ-લે સ્વસ્થતા રાખી લે કે આપી દે

સમય બદલાય છે ’ને પરિવર્તન આવતું રહે છે. ઋતુ બદલાય છે ’ને મનુષ્યના તન તેમ જ મન પરિવર્તન પામે છે. ફેરફાર જ્યારે તંદુરસ્તીમાં થાય ત્યારે ફિકર કરવી પડે. ઉત્તર ભારતમાં વસંત પંચમી તાપમાનમાં બદલાવ આવવા માટે સૂચક ગણાય છે. આપણે ત્યાં મહાશિવરાત્રિ પછી ઠંડી શિવ શિવ કરતી જાય એમ કહેવાય છે. એમાં માઘ ’ને ચૈત્રની વચ્ચે હોળી આવે એટલે બરાબર ઉનાળો બેસી ગયો ગણાય. પરંપરાગત રીતે ફાલ્ગુન માસ જળ, રંગ ’ને પુષ્પથી ઊજવી આપણે એ પછીના ફરજિયાત સૂર્યસ્નાન માટે તૈયાર થઈએ છીએ. શિયાળામાં ગળપણ, ચરબી ’ને વિવિધ લીલોતરીથી દેહને તૃપ્ત કર્યા બાદ આહારમાં પરિવર્તન આવે ’ને લાવવું જ જોઈએ. બહારના અગ્નિની સ્થિતિ બદલાય એમ અંદરના અગ્નિની સ્થિતિ બદલાય 'ને એ પ્રમાણે આપણે સ્વાદ 'ને ક્ષુધાનું વ્યવસ્થાપન કરવું રહ્યું, નહીંતર સ્વાસ્થ્યનું સમતોલન ખોરવાઈ જાય. પાનખરમાં જે મોજાં, ટોપી ’ને શાલ ચઢાવ્યા હોય એ પછીથી ના ઉતારીએ તો પિત્તો ટીલડીમાં ચોંટેલો પતંગ આકાશમાં ઊંચે ચડ્યા કરે એમ ચઢતો જાય ’ને આપણું આરોગ્ય મોઢું ચઢાવી દે.