જ્યોર્જ સોરોસનો બિનજરૂરી વાણીવિલાસ

સોરોસ મૂળભૂત રીતે રાજકીય વ્યક્તિ નથી, પરંતુ પૈસાના જોરે તેઓ અમેરિકાની રાજનીતિમાં દખલ ધરાવે છે. તેઓ પોતાની જાતને વિશ્વભરમાં લોકશાહીના તારણહાર સમજે છે. પણ એ તેમનો ભ્રમ છે

જ્યોર્જ સોરોસ નામના ધનપતિએ તાજેતરમાં ભારતના વડાપ્રધાન અને ભારતની લોકશાહી વિશે કરેલા વિધાનોએ ભારતમાં ઉગ્ર પ્રતિક્રિયા જન્માવી છે. ભારત સરકાર વતી કેન્દ્રીય મંત્રી સ્મૃતિ ઇરાનીએ તેમનાં વિધાનોનો વિરોધ કરીને ભારતની આંતરિક બાબતોમાં ચંચુપાત કરવા સામે ચેતવણી ઉચ્ચારી હતી, પરંતુ સૌથી વધુ કડક ભાષામાં સોરોસને ભારતના વિદેશપ્રધાન એસ. જયશંકરે જવાબ આપ્યો છે. ફિજીમાં વિશ્વ હિન્દી સંમેલન નિમિત્તે હાજરી આપવા ગયેલા જયશંકરે પત્રકારના પ્રશ્નના જવાબમાં કહ્યું હતું કે, જ્યોર્જ સોરોસ ધનાઢ્ય અને વૃદ્ધ માનવી છે. જે એવું ઇચ્છે છે કે તેમના કહેવા પ્રમાણે દુનિયા ચાલવી જોઈએ, પરંતુ એવું બનતું નથી અને બનવાનું પણ નથી. જ્યોર્જ સોરોસ ડૉલર સામે મતની ગણતરી કરે છે. તેમના વિધાનોથી ભારતની લોકશાહીને કોઈ અસર થવાની નથી.