સંધાનમ્: સુરતમાં બનેલી સંસ્કૃત શોર્ટ ફિલ્મને ૩ એવોર્ડ

नास्ति मूलम् कुतः शाखा જો મૂળ જ નહીં રહે તો શાખા ક્યાંથી હશે? સંસ્કૃત આપણા ડીએનએમાં છે. સંસ્કૃત આપણા દેશનો અમૂલ્ય વારસો છે. તે વૈશ્વિક કક્ષાએ આપણને ગૌરવાન્વિત કરે છે. તેથી તેનું સંવર્ધન અને સંરક્ષણ આપણા સૌનું ઉત્તરદાયિત્વ બને છે.

- જિજ્ઞાસા સોલંકી

સંસ્કૃત સ્કૃત ભાષાના પ્રચાર અને પ્રસાર અર્થે કામ કરતી ‘સંસ્કૃત ભારતી’ સંસ્થા દ્વારા ૨૭જાન્યુઆરી, ૨૦૨૩ના રોજ નાગપુરમાં આંતરરાષ્ટ્રીય સંસ્કૃત લઘુ ચલચિત્રોત્સવ-૨૦૨૩નું આયોજન કરવામાં આવ્યું હતું. જેમાં દેશભરમાંથી તેમ જ યુએસએ, યુએઈ જેવા દેશોમાંથી પણ કુલ ૧૦૮ જેટલી એન્ટ્રી આવી. એમાંથી કુલ આઠ શોર્ટ ફિલ્મોની પસંદગી થઈ. ‘ઉરી’ અને ‘દશ્યમ’ ૧-૨માં કામ કરનાર અભિનેતા તેમ જ હિન્દી અને મરાઠી ફિલ્મોના નિર્દેશક, લેખક યોગેશ સોમણ અને સંસ્કૃત ભારતી અખિલ ભારતીય અધ્યક્ષ ગોપબંધુ મિશ્ર જેવા વિશેષજ્ઞોની ટીમ દ્વારા શ્રેષ્ઠ શોર્ટ ફિલ્મની પસંદગી કરવામાં આવી. જેમાં સુરતની શોર્ટ ફિલ્મ ‘સંધાનમ્’ પ્રથમ સ્થાને આવી. સુરતમાં બનેલ આ શોર્ટ ફિલ્મની વિશેષતા એ છે કે તે સંપૂર્ણ સંસ્કૃત ભાષામાં બની છે. સંસ્કૃત સંવાદ મહદ્અંશે સમજી શકાય તેવી સરળ સંસ્કૃત ભાષામાં લખાયેલા છે. સામાન્ય દર્શક સમજી શકે માટે સાથે અંગ્રેજી સબટાઇટલ પણ આપવામાં આવ્યા છે. આ ફિલ્મ થકી દેવ ભાષા સંસ્કૃત ભાષાને લોક ભાષા તરીકે પ્રમાણિત કરવાનો પ્રયત્ન કરવામાં આવ્યો છે.

ફિલ્મના નિર્દેશક મોનાક્ષ કાનીરકરને નાગપુરમાં પુરસ્કાર અપાયો હતો

આત્મહત્યા જેવા સંવેદનશીલ વિષય પર બનેલી આ શોર્ટ ફિલ્મમાં બે પેઢીની, એક યુવા અને એક વૃદ્ધ વ્યક્તિની વાત છે. બંને વ્યક્તિ એક જ સમયે, એક જ સ્થળ પર આત્મહત્યા કરવા માટે ભેગી થાય છે. પોતપોતાના જીવનની સમસ્યાઓથી નિરાશ થયેલા, હારી ગયેલા બંને અજાણ્યા મનુષ્યોને એકબીજા માટે અનુકંપા જન્મે છે. ધીરે-ધીરે પરસ્પર સંવાદ કરતાં કરતાં એકબીજાને તેમના દુઃખની વાતો કરે છે. સંવાદ દરમિયાન બંને વ્યક્તિમાં તેમની સમસ્યાઓનો સામનો કરવાની હિંમતનો સંચાર થાય છે. મૃત્યુના શરણે આવેલા અંતે એકબીજાના જીવનદાતા બની જાય છે. જીવનનો અંત આણવા તત્પર બનેલા આ અજાણ્યા લોકો લાગણીસભર બની પિતા-પુત્રની જેમ ભેટી પડે છે. જીવનના અણગમાથી મનમાં વ્યાપેલા અંધકારને દૂર કરીને તેઓ ફરીથી નવા પ્રભાતની જેમ જીવનનું પુનઃસંધાન મેળવી લે છે. ‘સંધાનમ’ ફિલ્મ આધુનિક જીવનની સમસ્યાઓથી ઘેરાયેલા, હતાશ થઈ આત્મહત્યાનો પ્રયાસ કરનાર લોકોમાં આશાનો સંચાર કરી જીવનને એક નવી જ દૃષ્ટિથી જોવાનો સંદેશ આપે છે.

શૂટિંગ સમયનું એક દ્રશ્ય