સીધો અને સરળ ઉપાય

તમે તમારા પૈસા ક્યાંથી લાવ્યા? એ વ્હાઇટના છે એ દર્શાવી શકો એમ હોય તો તમારા માટે ઈબી-૫ પ્રોગ્રામ હેઠળ પ્રાપ્ત થતું ગ્રીનકાર્ડ એક ઉત્તમ પર્યાય છે

- ડો.સુધીર શાહ

દિવસે દિવસે અમેરિકાના વિઝા મેળવવા મુશ્કેલ જ નહીં, પણ એ મેળવવા માટે વાટ જોવાનો સમય પણ લંબાતો જાય છે. આજે ઇમિગ્રન્ટ કૅટેગરી હેઠળ એક અમેરિકન સિટીઝન એની ભારતીય પત્ની યા પતિ યા માતાપિતા માટે ઇમિગ્રન્ટ વિઝાની પિટિશન દાખલ કરે તો એની હેઠળ ઇમિગ્રન્ટ વિઝા, જે પહેલાં આઠ-દસ મહિનાની અંદર જ મળી જતા હતા, એ મળતા હવે દોઢ બે વર્ષ લાગે છે. ઇમિજેટ રિલેટિવ કૅટેગરી હેઠળ જે ઇમિગ્રન્ટ વિઝા અપાય છે એ તો વાર્ષિક ક્વોટાના કોઈ પણ પ્રકારનાં બંધનોથી સીમિત નથી. આમ છતાં એ હવેથી એટલા વધુ પ્રમાણમાં દાખલ થવા લાગ્યા છે કે એને પ્રોસેસ થઈને એપ્રુવ્ડ થતાં જ અને એપ્રુવ્ડ થયા બાદ કોન્સ્યુલેટમાં ઇમિગ્રન્ટ વિઝાના ઇન્ટરવ્યૂની તારીખ મેળવવામાં ખૂબ જ વાર લાગે છે. ચાર જુદી જુદી ‘ફૅમિલી પ્રેફરન્સ કૅટેગરી'ઓ હેઠળ ભારતીયો માટે જે અમેરિકામાં રહેતા એમના અમેરિકન સિટીઝન માબાપ યા ભાઈબહેન અને ગ્રીનકાર્ડધારક પતિપત્ની પિટિશનો દાખલ કરે છે ’ને જે પિટિશનો વાર્ષિક ૨,૨૬,૦૦૦ ક્વોટાનાં બંધનોથી સીમિત હોય છે, એની હેઠળ તો ઇમિગ્રન્ટ વિઝા મેળવવા માટે વર્ષોની વાટ જોવાનો સમય આવી ગયો છે.